EDITORYAL - Ang padayong panagit og kabataan

Kining giingong dul-an nang 20 ka mga taho sa pagpanagit nga nahitabo dinhi sa Metro Cebu human dagita ug patya si Ellah Joy Pique, suma sa kapolisan ,di baya ni katiaw-tiawan.

Gisegundahan usab kini ni Kapitan George Rama sa Basak- San Nicolas kinsa siya mismo nakadawat sa mga reklamo labot sa daghan nang mga hulga sa pagpanagit sa mga tinun-an sa eskuylahang iya sa gobyerno sa iyang lugar.

Ang labing bag-ong gidagit mao ang 13 anyos nga tinun-an sa high school sa Basak –San Nicolas .

Walay nakasaksi sa nahitabo sa biktima, ug ang iyang binugtong nga asoy sa nahitabo kaniya, gipamatud-an sa mga ginikanan ug sa iyang maestra nga nawala gyud tinuod ang maong bata.

Mao ra og di kaayo katuohan tungod kay wa may taga Naga nga misuporta sa gipahayag sa bata, busa ang uban nagduda sa kamatuoran sa iyang gipahayag.

Apan may pangagpas si Kapitan Rama sa dakong kalagmitan nga may sindikato sa mga kidnaper nga naglihok dinhi sa Sugbo.

Sa unsang katuyoan? Wala kaayo ta masayod sa motibo niining grupoha, ug malisod usab nga magtumo-tumo ta bahin sa unsa gyuy buhaton nila sa ilang madagit.

Apan anhi dinhi palihoka sa kapolisan ang gitawag nilang intelligence power, aron nga masuta kun tinuod ba kining mga nadawat nilang mga taho nga may mga hulga sa pagpanagit matag karon ug unya nga nahitabo dinhi sa Metro Cebu.

Kanus-a pa diay molihok ang mga otoridad, unya na usab kun may laing Ellah Joy nga madisgrasya? Di   ba?