Leksyon sa mga opisyal

Diay leksyon alang niadtong mga opisyal sa kagamhanan nga maisip nga “appointing authority” unya mopasulod og trabaho diha sa gobyerno sa ila nga mga kabanay.

Gisustinehan sa Supreme Court ang hukom sa Sandiganbayan (Anti-Graft court) nga nagpahamtang og 64 ka tuig nga pagkapriso ngadto ni kanhi mayor Paulino Ong sa Naga.

Nasayran sa Ombudsman nga wala magtug-an si Ong nga sila si Rosalio S. Galeos ug Federico T. Rivera iya ra nga paryente. Gipasulod man ni Ong sila si Galeos ug Rivera sa permanent positions, aw piti sa Sandiganbayan. Ang Supreme Court pinaagi sa Third Division nga gipangulohan ni Associate Justice Conchita Carpio-Morales miingon nga wala g’yuy basihanan nga usbon nila ang hukom sa Anti-Graft Court.

Tingali gusto lang ni Ong nga motabang sa iyang kabanay apan unsaon, duna may balaud nga nagdili niini mao nga silotan g’yud siya.

Kamong ubang mga opisyal, mayor, gobernador ug mga head sa lainlaing government agencies, likayi ninyo ang pagsunod sa mga tunob ni Ong aron dili kamo magkaproblema.

* * *

Nakadawat ko og reklamo gikan sa suki nakong magbabasa sa akong lindog dinhi sa Banat News.

Gireklamo niya ang kamahal sa kantidad sa documentary stamp nga gibaligya diha sa PNP Traffic Group kay samtang tag P15 ra ang documentary stamp sa uban, diha sa Traffic Group tag P25.

Gidala nako kining maong isyu ngadto ni Atty. Rafael Christopher Yap ang hepe sa Cebu City Transportation Office (CCTO) diin gikonpirmar niya nga mahal g’yud ang baligya sa doc stamp diha. Ang rason kuno matud ni Yap, kay ang Bureau of Internal Revenue (BIR) dili na mobaligya og dinaghan nga documentary stamp mao nga mapugos kuno ang personnel pagpalit og documentary stamp gikan sa Davao.

Gipasabut ko ni Atty. Yap nga napugos ang iyang sakop pagpalit og mas mahal nga documentary stamp, nga tingali ginegosyo sa uban, aron nga dili ma-inconvenience ang mga molukat og police report. Kadto gud nga mga tag-iya og sakyanan nga nakasugat og aksidente kun mokuha’g police report kabahin sa hitabo kinahanglan man nga mobayad og documentary stamp.

Apan ang nakadaut kay gihimo nga P25 ang documentary stamp diha sa Traffic Group nga unta P15 ra man ang kantidad. Negosyo usab tingali nga ginagmay sa mga kawani sa City Hall nga gibutang diha sa Traffic Group.

Ipahunong kuno kini ni Atty. Yap. Buyno, ambot kini ba kaha ang sulbad, tan-aw nako dili maayo kay ang mga mokuha’g report maoy matagbaw pagpangita og asa siya makapalit.

Ang maayo tingali mao nga kun hapit na mahurot ang gipalit nga documentary stamp, mo-request na usab ang kawani nga gipiyalan niini sa BIR aron nga ang presyo barato ra.

* * *

Samtang nagtan-aw ko sa mga unipormado nga sakop sa CITOM (karon gitawag na og Cebu City Transportation Office (CCTO) enforcers) nga naghimo’g Parade and Review sa atubangan sa City Hall atol sa Charter Day niadtong Huwebes, taas kaayo ang akong pagtan-aw kanila.

Akong giingnan si City Hall public information officer Carlo Dugaduga nga kun magtinarong lang g’yud ang mga traffic enforcers sa ilang trabaho, madisiplina man g’yud ang mga drayber.

Apan unsaon, duna may pipila kanila nga maoy naghatag og kadaut sa dungog sa mga traffic enforcers kay modawat man og suborno gikan sa ilang dinakpan. Sila maoy maisip nga mga “dunot” nga liso nga dili angay nga padugayon diha sa CCTO kay manakod unya.