Makab-ot kaha ni Ella Joy ang hustisya?

Gipasakaan na og kasong special complex crime of kidnapping with homicide ang mga suspetsado sa pagpatay sa 6 anyos nga si Ellah Joy. Ang gipasakaan og kaso mao ang managhinigugmaay nga sila si Sven Erik Berger ug Karen Esdrelon. Si Berger usa ka Enhenyero nga Norwegian national samtang si Esdrelon usa ka rehistradong nurse nga Sugboanon. Gidakop sila sa mga police samtang mopaingon na unta sa Hong Kong aron adto kini magsaulog sa adlaw sa gugma.

Ang duha gidakop tungod kay mitukma ang ilang mga dagway sa cartographic sketch nga gihimo basi sa paghulagway sa mga kauban ni Ellah Joy nga nakasaksi sa hitabo. Positibo usab silang giila sa mga batang nakasaksi sa pagdagit sa biktima. Apan hugot nga gipanghimakak sa duha ang pasangil nga gibato ngadto kanila. Giasoy ug gidetalye pag-ayo sa mga akusado ang ilang mga lakaw niadtong adlaw nga nahitabo ang krimin ug matud pa nila wa gayod mahitabo nga naabot sila sa lungsod sa Minglanilla ug Barili. Apan gikonsiderar sa mga abogado sa prosecution nga alibi lamang ang pangangkon sa mga akusado.

Sigun sa rules on evidence ang alibi mao ang pinakahuyang nga matang sa ebidensiya ug dili kini makapiog sa positibong pag-ila sa saksi ngadto sa tawo o mga tawo nga naghimo sa krimin apan lig-on usab kini nga mobarog pabor sa akusado kun ang alibi mapamatud-an.

Ang kaso nga gipasaka batok sa mga akusado nakasandig lamang sa positibong pag-ila sa mga batang saksi ngadto sa mga akusado. Pero unsa ba gayod ka positibo ang mga bata sa ilang pag-ila ngadto sa mga akusado? Sa dihang giila sa mga bata ang mga akusado, wala pa ba kaha ma-distort niadtong panahona ang ilang paminsar o panghuna-huna tungod sa ilang nakita o nasaksihan dihang gidagit ang ilang kauban nga si Ellah Joy? Sa pagseguro nga dili pa distorted ang paminsar sa mga nakasaksi sa hitabo gipahiling ba sa atong mga police og psychologist ang mga batang saksi? Aduna man ugod dakong posibilidad nga maapektohan ang paminsar sa tawo tungod sa dili maayong kasinatian nga iyang masaksihan o nasaksihan.

Si Berger ug Esdrelon pulos mga professional ug pulos way mga kriminal record ug deritso kun manubag sa mga pangutana diin sila dihang nahitabo ang krimin busa mahimo nimo siyang toohan. Busa awhag nako ngadto sa atong kapolisan, paladman pa ang imbestigasyon aron hingpit gayod nga masungkit ang hustisya sa anghel nga gipatay. Dako man ugod nga inhustisya ngadto kang Ellah Joy kun ang taralon sa hukmanan mao ang mga tawo nga way kalibotan sa kaso. Mas labaw upod nga di makiangayon ug makatarunganon kun ang gitaral mao ang mga tawo nga kapariha lang og dagway sa mga kriminal.