Walay pili-pili gud

Kinahanglang pamatud-an g’yud sa administrasyon ni Mayor Michael Rama nga dili siya bayas sa pagpatuman sa balaud.

Ang gipasabut nako mao nga angay’ng panggub-on usab sa mga kawani sa kagamhanan sa dakbayan ang mga illegal structures nga iya sa mga adunahan nga gitukod diha sa kasapaan.

Law-ay man gud kaayo nga maayo lang kita nga mangguba sa mga balay ug barung-barong sa mga kabus apan walay mahimo batok sa mga illegal structure sa mga datu.

Tiaw mo nga ang tul-id nga sapa diha sa barangay Banilad duol sa Mahiga Bridge nahimong baliko tungod sa gitukod nga illegal riprap sa dakung commercial establishment.

Mipasalig na hinoon si Engr. Josefa Ylanan, ang hepe sa Office of the Building Officials (OBO) nga susihon niya kini kun ngano nga wala mabadlong sa kagamhanan ang pagtukod sa maong riprap diha sa sapa. Unsaon man gud, kuwang man og pagpakabana ang kadaghanan sa mga opisyal sa barangay sa pagbadlong sa mga gitukod nga illegal structures diha sa ilang dapit.

Ang rason mao nga mahadlok sila nga kun motinuod sila sa pagdili batok sa pagmugna og illegal structures, basin og dili na sila makadaug sa sunod eleksyon.

Nagpasabut nga ang personal interest ra gihapon maoy gipatigbabaw sa maong mga opisyal ug dili ang interest sa kinabag-an. Pastilan g’yud!

* * *

Awhagon diay nako ang mga opisyal sa City Hall, ilabi na ni Mayor Michael Rama, ug sa mga department heads nga hingtungdan. Kadaghan na ko makamatikod nga dunay daghang mga sakyanan nga iya sa dakbayan nga dili kompleto og mga suga samtang magdagan-dagan kini panahon sa gabii.

Malooy intawon kita sa mga drayber nga maoy madakpan ug makamulta kun madakpan sila kay wala ninyo hitsasi og suga ang inyong mga sakyanan.

Sama niadtong miaging gabii, gipara sa mga LTO agents ang usa ka sakyanan nga kuwang og mga suga, apan trak diay kini sa basura nga nadistino sa Department of Public Services. Ang balaud gud wala man mag-ingon nga ang mga sakyanan nga iya sa kagamhanan exempted sa pagpatuman sa balaud kay ang mga drayber ra ba niini ang uban danghag kaayo mopadagan.

Unya na ba kita mohimo’g lakang kun duna nay mahitabo? Sama sa gihimo nato karon nga pagpangguba sa mga illegal structures sa Mahiga Creek abi kay nakamugna kini og lunop pipila ka adlaw ang milabay?

* * *

Ang ubang barangay nagka-problema sa pag-andam sa ilang budget mao nga apektado ang pagpatuman sa mga proyekto sa ilang barangay.

Giangkon ni T. Padilla barangay Kapitan Michael Ralota nga usa sa hinungdan niini kay ang ubang mga barangay treasurer walay kasinatian sa mga “financial matters.”

Unsaon, ang ubang mga opisyal sa barangay mokuha man og mga treasurer nga wala g’yud intawo’y kahibalo sa ilang trabaho. Matud ni Kapitan Ralota nga ang ubang opisyal mobawos man paghatag og trabaho sa ilang mga political supporters nga dili g’yud maayo.

Apan unsaon, naa na man g’yud. Himoan nalang nila kini og sulbad pinaagi sa pagpatambong niining maong mga appointed barangay treasurers og usa ka seminar nga katudloan sila sa ilang trabaho.

Maayo unta og pinaagi niini makapabuka kini sa mga opisyal sa kabarangayan nga ang ibutang nila sa pwesto kadto ra g’yud nga mga tawo nga maantigo sa trabaho nga isangon kanila.