Sabut-sabot

Taliwa sa pahibawo ni Mayor Michael Rama nga usa ka Technical Working Group ang iyang giumol aron makigsabot sa Kapitolyo unsaon pagsulbad ang problema sa mga molupyo nga nagpuyo sa mga luna ubos sa 93-1, si Gobernador Gwen Garcia miingon nga sila maoy magbuot sa mga lagda sa sabut-sabot.

Inay nga makig-estorya sa panel nga giumol ni Rama gusto sa Kapitolyo nga duha lang ang magsabot. Sila mao si Capitol Consultant Rory Jon Sepulveda ug si City Administrator Jose Mari Poblete.

Si Garcia miingon nga kini maoy katapusang higayon nga iyang ihatag sa dakbayan aron sa pagpakigsabot sa Kapitolyo.

Tataw nga way salig si Garcia sa ubang mga membro sa panel nga giumol ni Rama tungod sa dayag sab nga hinungdan. Sagad nila mga tawo ni Kongresista Tomas Osmeña.

Sa sabut-sabot importante ang pagsalig sa imong gikasabot mao nga mas makatabang alang sa hapsay nga dagan sa negosasyon ang pagsanong sa gusto sa Kapitolyo kinsay buot nilang ikasabot.

Wa man say kapuslanan ang pag-insister nga panel gyud maoy makigsabot tungod kay gawas nga makahaling lang ni og dugang tensiyon mas gubot pud og daghan ang mopapel.

Ang maayong buhaton sa dakbayan nga pangayoan nalang sa ilang inputs ang ubang gitudlo nga sakop sa panel ug ihatag kang Poblete aron siya na maoy modala niini atol sa ilang panagtagbo sa representante sa Kapitolyo.

Ug aron mas dako ang purohan nga molampus ang negosasyon, mas makatabang kun likayan sa Kapitolyo ang pag-insister nga sila maoy magbuot sa mga kondisyon atol unya sa negosasyon.

Kini tungod kay ang paghimo sa ingon usa ka pagpakita sa pagkaarogante ug makahaling ni og kasuko sa pikas grupo. Unsa pa may kapuslanan sa sabut-sabot kun ang Kapitolyo lang diay gihapon maoy magbuot sa tanan?

Mao bitaw nga dunay negosasyon aron sabutan ang mga punto nga acceptable sa duha ka habig. Busa dili sab husto ang giingon ni Garcia nga sila maoy magbuot sa tanang kondisyon tungod kay sila maoy anaa sa posisyon ug naghupot sa tanang alas.

Aron molampos ang usa ka negosasyon kinahanglang ang duha ka habig mohimo og sakripisyo.

Bisan tinuod ang gisulti sa gobernador nga sila unta ang naa sa pwesto nga mosita sa kondisyon sanglit sila may tag-iya sa luna, apan kay nisulod man ta sa sabut-sabot angayang dunay mga sakripisyo nga atong himuon.

Alang ni Kongresista Tomas Osmeña mas maayong mohimo sab siya sa iyang kaugalingong sakripisyo pinaagi sa pagpakahilom sa maong isyu ug dili lang manghilabot sa negosasyon.

Mas makatabang siya sa maong paagi sa mga pamilya nga nahulga nga mapalagpot sa ilang gipuy-an kun bawi-on gyud sa Kapitolyo ang ilang mga luna sa higayon nga mapakyas ang sabut-sabot.

* * *

[email protected]