Sayop ang LTFRB

Misulod na ang Bag-ong Tuig. Kapaspas gayud sa panahon. Human sa mga party sa nakalabay’ng bulan, ania na kita sa 2011.

Ug akong itunol ang akong mainitong pasalamat sa mga tigsubay sa Banat News, ilabina niadtong tigsunod niining akong lindog. Bulahang Bag-ong Tuig kaninyong tanan!  

Bag-ong Tuig, bag-o na usab ang mga panghitabo ang atong sagubangon. Ug karong tuiga, mas maayo sigurong mangandam na kitang daan.

Kay nahisgutan nato ang pagpangandam sa mga panghitabo, dako gayud nga sagubangon sa publiko ang pagtaas na usab sa pletihan sa taksi sa unang bulan sa karong tuiga.

Sa niaging semana, gianunsiyo sa Land Transportation Franchising and Regulatory Board ang bag-ong umento sa pletihan sa taksi sa Enero. Dili kini maayong pinaskohan sa publiko, ilabina niadtong mga sumasakay.

Sugod karong Enero 15, ang flagdown rate sa taksi P40 na. Ug ang kada mosunod nga 300 metros P3.50 na. Nagpasabot kini nga mokuot na gayud og lawom sa ilang bulsa ang publiko kun mosakay sila og taksi.

Apan adunay kondisyon ang LTFRB ngadto sa mga operator sa dili pa nila ipatuman ang umento sa pletihan. Kinahanglan ang mga operator mohatag gayud og resibo ngadto sa mga pasahero, mobayad og filing fee ug magsul-ob og mga uniporme ang ilang mga drayber. 

Hinuon, ang approval sa LTFRB sa bag-ong umento sa pletihan usa ka maayong pinaskohan sa mga taxi operators ug drayber. Atong mahinumdoman nga kaniadto pang Abril mipasaka ang mga operator og petisyon alang sa umento sa pletihan apan kaniadto lamang Disyembre 23 giaprobahan kini sa LTFRB.

Dugay nang yangongo sa mga operator ug drayber ang umento sa pletihan. Rason nila nga dako na ilang pagkalugi gumikan kuno sa sunod-sunod nga pagtaas sa presyo sa gasolina, krudo ug uban pa.

Ug nakita nilang maayong pinaskohan alang kanila ang pagtugot sa LTFRB sa bag-ong umento sa pletihan. Alang kanila, makaginhawa na sila og dako sa ilang inadlaw nga kita.

Apan alang sa publiko, ilabina niadtong mga sumasakay matag adlaw, dugang na usab kini nga palas-anon. Dugay nang nag-agwanta ang publiko sa grabe’ng ka mahal sa presyo sa mga nag-unang palaliton nga halos dili na gani maabot sa ilang inadlaw nga budget.     

Sigurado gayud nga matibhangan og dako ang atong mga budget alang sa atong mga pamilya niining pagtaas sa pletihan sa taksi.

Sa akong tan-aw, dakong sayop ang lakang sa LTFRB sa desisyon niini nga pag-approve sa pletihan sa taksi. Kini tungod kay dako kini og epekto ngadto sa mga sumasakay.

Gitan-aw unta sa regulatory body kun unsa ang epekto niining umento sa pletihan sa taksi ngadto sa publiko una pa kini moaksiyon sa petisyon sa mga operator. Karon, dili gayud malikayan kun adunay mobuthong mga protesta batok sa desisyon sa LTFRB.

* * *

Email: [email protected]