Inom sa Fuente Osmeña

CEBU, Philippines - Kinsa bay nagbuot-buot nga makapabaligya og mga ilimnong makahubog sama sa binotelya nga beer diha sa Fuente Osmeña rotunda?

Misiga ang akong mga mata pagkakita nga sa milabay’ng mga gabii nga nakaagi ko diha sa Fuente Osmeña duna may namaligya og beer.

Niadtong miaging gabii, nakaagi na usab ko ug mao gihapon ang talan-awon. Ako kini nga gidala ang maong isyu ni Mayor Michael Rama. Salamat nga misaad dayon og aksyon ang mayor apan ambut og mapatuman ba kaha kini dayon sa iyang mga opisyal nga gisaligan pagdumala diha sa Fuente Osmeña.

Ang City Ordinance 1413, nagdili pagpamaligya og mga ilimnon nga makahubog apil na ang beer diha sa mga “prohibited areas.”

Unsa kining mga lugara? Apil niini ang mga public plaza, mga dapit nga nahimutang sulod sa 100-meter gikan sa mga tunghaan, ospital ug simbahan.

Ang ordinansa hinoon nagtugot nga mahimong makabaligya gihapon og mga ilimnong makahubog diha sa maong mga dapit kun ang namaligya makakuha og “special permit” gikan sa mayor.

Bugti sa paghatag og “special permit” mao ang pagbayad og P6,000. Apan matud ni Rama nga dili g’yud siya gusto nga kabaligyaan og mga ilimnong makahubog ang maong dapit.

* * *

Daygon nako ang tigpasiugda sa Cebu City Progressive Uptown Movement kay sila ang naningkamot aron nga kahatagan nila og kalipay ang kabataan sa 11 ka barangay dinhi sa dakbayan nga anak og mga kabus.

Salamat kaayo ni Bill Hillditch, ang executive director sa maong Non-Government Organization (NGO) kay nagpakabana siya sa mga kabus nga kabataan bisan og siya usa ka langyaw.

Tag 150 ka bata ang ilang kuhaon gikan sa matag usa sa 11 ka barangay. Aw dili g’yud hinoon tanan nga bata ang mahatagan og gift ug makatambong sa maong party, apan arang-arang na lang kay sa wala.

Salamat kaayo sa 21 ka balay-patigayon diha sa Uptown Areas nga nagtampo-tampo og salapi aron nga ang mga bata mahatagan og kalipay panahon sa Pasko.

Karon man gud, panahon sa paghinatagay. Kadtong maka-afford nga mohatag, hatag mo og bisan unsa nga makapalipay sa mga nanginahanglan.

Ako gani, pobre man ko, pero gisugat ko sa usa ka higala nako nga polio victim pag-abut nako sa opisina kagahapon ug gikomedyahan ko nga mangayo siya’g pinaskohan, wa g’yud ko magpanuko pagkuot sa pitaka.

* * *

Gidayeg nako ang mga opisyal sa Kapitolyo kay mikontak sila nako ug mitug-an nga may punto usab ang akong pagsaway nga dagko ang gihatag nila nga cash gift nga tag P20,000.

Mao kana ang mga tawo nga tarung og huna-huna dili sama adtong mi-text nako nga nagpatuo nga datu na siya ug gibiay-biay ko kay pobre, nga baliko kaayo og argumento.

Malutsan ka ra bitaw unya og warrant. Ang nakabati sa tawo nga magtinalawan kay dili magpaila. Apan nakaila na nimo pinaagi sa tabang sa mga higala ko sa intelligence.

Nalambigit ka man gani og anomaliya. Mao diay nga nangangkon ka nga datu kay nakabahin man. Pait!

Mas maayo pa ang panyawan nimo kay matulon pa ang duga.

Makit-an ko lang ikaw pag-usab nga magsuroy-suroy sa ubang opisina gawas sa Kapitolyo atul sa ting-trabaho makita nimo og unsay sunod nga mahitabo. Huwata na Day aron mapanton ka. (BANAT NEWS)