Luwas nga Pasko

Dili na gyud ikalalis nga nagka duol na gayud ang Pasko. Gawas sa materyal nga pagpangandam sama sa pagpangadorno ug pagpamalit og mga pinaskohan, pormal na usab nga gisugdan ang atong pagpangandam sa espirituhanong aspeto sa maong pagsaulog. Nasayod kita nga niadtong Disyembre 16, 2010 maoy unang adlaw sa Misa de Gallo kon simbang gabi nga atong gihimo sa sayong kadlawon.

Ug nganong gitawag kana og simbang gabi, murag di na ko maka esplikar niana. Bitaw komedya ra. Mao man gud atong naandan, ato nalang pod nga sundon. Niadtong tuig 2009 mapasigarbohon kung mopa ambit nga nakompleto ko gyud ang 9 ka adlaw nga mag bakod sa sayong kabuntagon aron makasimba. Sama sa unang tuig, buot ko usab nga makompleto kini karong tuiga. Sa akong obserbasyon daghan gyud ang manimba ug akong nabalak-an ang kahimtang sa atong panimalay sa atong pagbiya. Maoy rason nga akong ipaambit ang pipila ka mga tips aron hingpit kitang luwas sa sunog ug sa mga kawatan nga mopahimos sa higayon. Mao kini ang mosunod:

1. Palunga ug tangtanga sa koneksyon ang tanang appliances nga de kuryente kong wala kini gamita.

2. Sa kadtong nagamit og kandila o lampara isigurado nga kini palongon sa dili pa mobiya sa panimalay.

3. Kun walay mahabilin sa panimalay isigurado nga naka lock ang mga pultahan kay karong panahona nag fund raising usab ang mga akyat bahay para pod siguro pang Noche buena. Kun mahimo ibotang ang iro diha sa atubangan.

4. Sa kadtong mahiligon kaayo og mga firecrackers ayaw intawon mo pabadlong pinaagi sa pagpaboto diha sa kadalanan nga dunay daghang mga tawo nga magpanon. Kadaghan na gyud ko makasinati niini. Porya buyag pwerte ka mga badlongon ug walay mga disiplina aning uban.Maayo ra ba unta ug ilang kuyamoy maoy maputol, makaingon ta og mirisi.

5.Kun kamo rang mga hamtong ang mosimba kay lagi mutongha pa og sayo atong mga anak ayaw intawn kamo paglakaw nga walay hamtong nga uban kanila. Usahay kaning atong kumpyansa mosangpot gayud sa trahedya.

Pipila lamang kini ka mga pahimangno nga kun ato lang sigurong hatagan og pagtagad makatabang kini sa atong pang adlaw adlaw nga kalihokan diin makasiguro kita nga layo gayud kita sa sunog nga moigo diha sa atong panimalay. Alang sa inyong kasayoran nga dunay kamandoan ang kadagkoan sa among ahensiya nga ang inyong kabomberohan nakaalerto niining panahona ug ngadto na sa Pasko ug sa Bag-ong Tuig. Manghinaut lang kita nga atong saulogon ang Pasko sa kamaya uban sa atong kabanay ug mga higala ug wala untay mga kakulian nga atong masinati sa maong pagsaulog. Gikan sa tanang sakop ug kinatibuk-ang pwersa sa BFP Region 7 Merry Christmas ug Happy New Year kanatong tanan!