EDITORYAL - Unsa ka haguka ang balaod?

Kasayon ra diay usbon sa balaod basta mga inilang negosyante ang makalapas.

Natataw kini dihang miduol ang usa ka negosyante ngadto kang Kongresista Tomas Osmeña ug nagpakitabang aron mahiuli kaniya ang P3 milyones kapin nga balor sa mga pabuto nga nasakmit sa mga otoridad gikan sa usa ka mall.

Tungod kay suod kuno kaayo niya, si Kongresista Osmeña mimandar dayon dihadiha nga ipausab ang Resolution 08-1394.

Ang maong resolusyon nagmandar nga ang tanang pabuto adto ra ikabaligya sa South Road Properties (SRP) ug kinahanglang adto ra usab kini sa maong lugar pabutha.

Ang maong balaod eksistido niadtong si Congressman Osmeña mao pay mayor sa Sugbo.

Sa iyang panahon, daghan nang nadakpan, apan gumikan kay dili suod niya, wala imando niini nga pa-amendahan ang maong balaod.

Apan karong dako siya og utang kabubut-on sa negosyante nga nasakmitan og mga pabuto, dali kaayo siyang nakamandar nga kinahanglang usbon ang maong balaod aron ipahaom ang mga teksto niini sa eksena nga dili mapiit ang iyang higala.

Ingon ra ba diay kahaguka ang atong mga balaod nga mahimo rang usbon aron lamang dili mapiit kadtong mga higala ug kasuod sa mga tigpatuman sa balaod?

Asa naman tong panultihon nga ang balaod, balaod gyud ug si kinsay molapas niini kinahanglang silotan?

Dili kaha mahimong kataw-anan kining sistemaha nga ang usa ka balaod butangan lang og ngipon aron ipaak sa mga tawong kabus ug walay kasuod nga mga opisyal sa gobiyerno?

Apan kun suod ugaling ka, mahimong lisoon ug usbon ang balaod aron lamang sa pagsalbar kanimo?

Pagkapait sa mga tawo nga uyamot ug dili tinamod sa katilingban kay ang balaod, balaod gyud ug dili na gayud matuis ug malalis batok kanila.

Taym pa, ingon gyud kaha niini ang naandan sa mga opisyal sa kagamhanan, nga kumo anaa sila sa gahum sayon ra kaayong usbon ang usa ka balaod aron ang ilang mga suod dili kasilotan kun makalapas?

Ang mga konsehal ning dakbayan nga gisuholan sa buhis sa katawhan aron paghimo og mga balaod, motuman kaha usab dayon niining mando ni Congressman Osmeña? Aw basin sab.