Gamhanan g'yud gihapon

Sa makausa pa napamatud-an na usab ang kagamhanan ni kanhi mayor ug karon Kongresista Tomas Osmeña.

Midaug g’yud si T. Padilla barangay captain Michael Ralota nga giendosar ni Tommy pagka presidente sa Association of Barangay Councils (ABC) atul sa election sa mga opisyal sa barangay.

Grabeha, 58 kontra 18 pabor kang T. Padilla barangay captain Michael Ralota. Dunay usa ka kapitan nga suod tingali kaayo nilang duha ni Ralota ug Busay barangay captain Yody Sanchez nga wala mobotar og presidente.

Sa 80 ka kapitan sa barangay, 77 ra ang mitunga og mibotar. Ang tulo ka kapitan sa Lahug, Babag ug Day-as wala makatunga sa ABC election kagahapon.

Gidawat ni Yody ang kaparotan kay matud niya dili man g’yud si Ralota maoy iyang kontra kun dili mao si Osmeña nga maoy nag-endorso sa kapitan sa T. Padilla.

Apan si Basak-San Nicolas barangay captain George Rama nga maoy campaign manager ni Yody wala gayud moyukbo sa kadaugan ni Ralota kay iyang gihulagway nga ang kadaugan nagumikan kang Tommy ug sa kwarta.

Bisan sa akong pakighinabi sa mga kapitan ilang giangkon nga lisud gayud nila nga balibaran si Tommy nga miendorso ni Ralota. Sa ato pa nga bisan og gitan-aw nila sa una nga adto silang Yody, napugos sila pagbiya.

Nadunggan nako ang pipila ka kapitan sa barangay nga miingon nga ang resulta sa ABC election maoy timailhan nga bisan ug dili na mayor si Tommy apan nagpabilin siya nga lig-on.

Apan gidayeg nako’s Yody kay matud niya human na ang politika pagpili og mga opisyal sa ABC, karon mosuporta siya sa mga programa ni Ralota pagdumala sa ilang kahugpongan.

Ang midaug pagka vice president sa ABC mao si Capitol Site Kapitan Manuel Guanzon, ug ang pagka Auditor mao si Camputhaw barangay captain Lorenzo Basamot.

Mga sakop sa Board of Directors mao sila si Petronilo Fat (Hipodromo), Pancho Ramirez (Santo Niño), Antonio Caruzca (Pahina-San Nicolas), Jerome Lim (Sta Cruz), Susan Enriquez (Kinasang-an), Nerissa Antolihao (Budlaan), Elvis Narra (Adlaon), Rey Oybenes (Mabini), Dominggo Lopez (Tinago), Vicente Ramos (Quiot), Rudy Estela (Mambaling) ug Rogelio Ruizo (San Roque).

Na hala, pagtinarong mo sa inyong katungdanan ha.

* * *

Ang mga gagmay’ng mangingisda nag-atubang diay karon og mangiob nga kaugmaon. Sunod nga katuigan tingali kinahanglan na sila nga mobugsay og layo-layo aron adto mangisda.

Atul sa kalihukan nga gipasiugdahan kagahapon sa Department of Environment and Natural Resources (DENR) gibutyag ni Director Dioscoro Melana nga daghang mga gasang sa kadagatan nagsugod na og pangamatay.

Ang hinungdan niini mao ang grabe nga polusyon ug ang pagsaka sa temperatura kon kainiton sa tubig sa kadagatan.

Ang mga gasang gud anaa man kini sa mabaw nga tubig mao nga tungod sa grabeng kainit, apektado ang gasang. Unya duna say pulosyon gikan sa kabalayan ug sa mga industriya.

Tabangan nato nga mamintenar nato ang kainiton sa panahon pinaagi sa pagpananom og mga kahoy. Kun may mga kahoy nga anaa sa atong palibut ayaw ninyo pamutla.

Diri bitaw sa akong balay, gilibotan kami og mga kahoy nga ang kalanggaman anha gani motugdon ug mopabati kanako sa ilang mga mananoy nga awit.

Kun gusto mo nga matunaw na ta sa kainit sa panahon, na hala puoha ang mga kahoy sa inyong palibut.