Tomas connection

Nakahinabi nako si Mactan-Cebu International Airport General Manager Engr. Nigel Paul Villarete kalabut sa report nga nagmaneho siya sa iyang sakyanan sa airport runway atul sa paglandig sa usa ka ayroplano.

Giklaro niya nga wala siya moagi sa runway apan sa vehicle ramp nga maoy kanunay niyang agian paingon ngadto sa iyang opisina.

Niadtong tungura dihay usa ka daku’ng ayroplano ang nagdagan sa taxiway ug wala pa makaabot sa apron. Ang marshall wala pa usab mosinyas sa ayroplano kun asa kini mohunong.

Sumala ni Villarete nga samtang niagi siya sa vehicle ramp nag-emergency lights ug nag-blinker siya nga nagdagan og 10 kph.

Nag-amping ug iyang gisunod ang tanang safety regulations.

Sumala niya nga ang kamatuoran nga walay angay’ng kabalak-an ang iyang gihimo kay wala’y incident log ang operations control room sa airport ug sa airline company.

“There was no incident!”, ni-insister si Villarete.

Sa dihang ako siyang gitambagan nga tingali’g adunay tawo o mga tawo nga naapektuhan sa iyang paglingkod isip GM nga buot modaut kaniya, igo lang siyang ni-text og “he he he.”

* * *

Usa ka Hongkong-based company ang buot mo-ugmad sa Sitio Warwick Barracks sa Barangay Ermita ug sa Freedom Park sa siyudad sa Sugbo.

Sa suwat ngadto kang Mayor Mike Rama miproponer sila nga magtukod og commercial complex sama sa Divisoria, alang sa mga kabus ug mga arangan pagkabutang nga katawhan ingon man parking area alang sa 360 ka mga sakyanan.

Kun mahinayon, makahatag kini og daghang trabaho ug mopalambo usab sa ekonomiya sa Sugbo. Mahusay na usab unya gikan sa trapik ug sa mga badlongon ang maong dapit.

Ang problema lang hinoon niini kay kinahanglan man nga papahawa-on ang mga okupante karon sa maong dapit.

Nagpaabot ako nga aduna na usab unyay mga protesta nga ilusad sa mga maapektuhan nga mga tag-iya og tindahan.

Anhi dinhi nato makita ang abilidad ni Mayor Rama sa pagkumbinsir kun ang iyang persuasive power aron pagpasabot sa mga hingtungdan sa kaayuhan sa maong proyekto.

Let’s do it, Mayor!

* * *

Lain na usab nga Sugbuanon ang gitudlo sa usa ka dakung posisyon sa Department of Transportation and Communication (DOTC).

Si City Traffic Operations Management (CITOM) Executive Officer Arnel Tancinco gitudlo isip assistant regional director sa Land Transportation Office (LTO).

Gituhuan nga siya maoy ika-duhang rekomendado ni Kongresista Tomas Osmeña nga natudlo sa Aquino administration.

Ang unang natudlo mao si Engr. Nigel Paul Villarete nga mao na karon ang Mactan-Cebu International Airport Authority (MCIAA) general manager nga ubos sa chairmanship sa DOTC secretary. Lig-on tingali’g koneksiyon si Kongresista Osmeña sa DOTC no?

Makapaabot pa ba kita og dugang mga Sugbuanon nga matudlo sa mga buhatan nga ubos sa DOTC sama sa LTO, Land Transportation Franchising and Regulatory Board (LTFRB), National Telecommunications Commission (NTC), Maritime Industry Authority (MARINA), Telecommunications Office (TelOf), Cebu Ports Authority (CPA) ug uban pa?

Kinsa man ang iyang konek diha sa DOTC? Si Secretary de Jesus o si Usec. Totol Batuhan? Dili kaha si Presidente Noynoy Aquino mismo?

Duha ka laing Sugbuanon, Dr. Potenciano Larrazabal, Jr. ug Bob Gothong, ang gitudlo nga mga sakop sa Philippine National Oil Corporation (PNOC) board.

Wala hinoon ako masayud kon giduso ba ni Kongresista Osmeña ang ilang appointment.

* * *

 Mga karneng baboy gikan sa gawas sa nasud ang naghitak na karon sa atong kamerkaduhan.

Ambut og apil ba ang mga baktin sa baboy nga maoy himoong lechon de leche ug mga Peking ducks niining maong importasyon?

Wala i-dili ang pagpasulod niining maong mga karne dinhi sa nasud basta motuman lang ang mga importers sa lagda ug reglamento sa gobiyerno kalabut sa kalimpiyo ug kaluwas niining kan-on sa tawo.

Kinahanglan usab silang mobayad sa husto’ng customs duties.

Ambut og husto ba ang buhis ang nasulod sa kaban sa gobiyerno apan ang labing siguro mao nga naghudyaka na usab ang mga buaya sa Cebu customs kay nakakilkil na man usab sila sa mga importers.

Nagduda naman hinuon ako nga gigamit na kining mga kawatan sa Cebu customs isip tirador sa mga kadagkuan sa Customs Commission.

Sultihi kuno ko ninyo kun si kinsay mga opisyal sa customs nga pobre kay atong ipahimo’ng Santos.  

* * *

Email:[email protected]