Wow versus kay Ganda

Sulod sa kapin sa siyam ka tuig gibandilyo sa Department of Tourism ang slogan nga “Wow Philippines” sa ilang kampanya pagbaligya sa nasud isip usa ka tourist destination.

Ang maong slogan gisugdan kaniadto sa panahon ni Senador Richard Gordon niadtong siya pa maoy kalihim sa DOT. Tungod kay nakita nga epektibo, gisagop ang samang slogan sa Sugboanong kalihim kaniadto sa DOT nga si Joseph “Ace” Durano.

Ang bag-ong kalihim sa DOT mismo nga si Alberto Lim admitido nga maayo nisaka ang tourist arrivals sa nasud. Timailhan ni nga epektibo ang kinatibuk-ang package sa atong pag-promote sa Pilipinas sa natad sa turismo.

Si Lim sa labing awahi niyang pagpakigtagbo uban sa mga sakop sa Makati Business Club, European, American ug Canadian Chambers of Commerce siya miingon nga nagpaabot siya og 3.3 milyones nga pagsaka sa tourist arrival sa nasud sulod ning tuiga.

Matud niya nga kini maoy labing taas nga tourist arrival sukad masukad sa kasaysayan sa turismo dinhi sa nasud. Kun mao nganong kinahanglan nato nga ilisan ang packaging?

Gikan sa “Wow Philippines” gihimo ni nga “Pilipinas, kay ganda.”

Wa may problema kun atong ilisan apan maayong atong itug-an ang hinungdan ngano. Kay kun way problema ang slogan nganong kinahanglan man nato nga hulipan? Tungod ba lang kay identified kaayo ang maong slogan sa niaging administrasyon?

Kun gusto mo nga maghimo og inyong kaugalingon way dautan niini apan siguroa nga mas mapalambo ninyo ang kasamtangan nga slogan inay nga inyong gub-on.

Ang bag-o nga slogan para nako nagpakita sa pagkadominante sa mga tagalog. Nganong sa pinulongan man nga tagalog ang atong gamiton? Dili sab tanan makasabot sa maong pinulongan.

Kun mismong dinhi sa Pilipinas dili makasabot ang tanan sa maong pinulongan unsaon man niini pagkahimong epektibo nga slogan sa kampanya pagdani og turista nga moduaw sa Pilipinas. Makasabot ba ang mga langyaw niini kun mismong sa paglitok maglisud gani sila?

Ang pulong “wow” man gud para nako maoy kinatibuk-an nga paghulagway sa usa ka butang nga makabibihag. Bisan way grado kun makadungog sa maong pulong isip expression makasabot nga nakagusto ka o ba kaha nakaayon ka sa imong nakita. Wa nay daghang pagpasabot, sa higayon nga moingon ka og wow masabtan ka ni bisan kinsa tungod kay common ni nga expression dili lang natong mga Pilipino.

* * *

[email protected]