Ang ka moderno sa mga kahimanan sa mga pabrika sa pirated nga salida dinhi sa dakbayan sa Sugbo naila niadtong Domingo.
Kini sa dihang wala pay usa ka oras sa pagkahuman sa sangka ni Pacquiao ug Margarito pinaagi sa live coverage sa mga cable TV, mikatap na sa mga baligyaanan og mga DVD sa mga sidewalk ang salida ni Pacquiao ug Margarito.
Kini usa ka tataw kaayo nga kamatuoran nga ania ra sa dakbayan ang pabrika sa mga pirated nga salida.
Hinuon bisan nasayod na ang mga otoridad sama sa mga miyembro sa CAIB bahin niini, apan nagpakabuta-bungol sila sanglit mas maayo tong mga material gyud sa salida maoy ilang sikopon aron attractive kaayong paligsan sa pison.
Nganong CAIB ang atong nahinganlan dinhi, kini tungod kay kining mga makinarya sa pabrika sa mga kinopyang salida gikan sa cable TV mao man gud usab ang gigamit sa pagpanggama og mga salida nga hilas ug law-ay nga maoy gigukod sa taga CAIB
Unya maayo tingale mobayad og buhis kanang mga pabrikaha kay wala may umoy ang taga CAIB sa pagpuhag pinaagi sa pagsakmit sa ilang mga kahimanan.
Naglukat usab tingale kining mga pabrikaha og business permit maoy hinungdan nga gipasagdan sila sa ilang mga negosyo dinhi sa dakbayan.
Apan kun lisensyado sila unya nangopya og salida sa pelikula aron ibaligya ngadto sa publiko nga nakaapektar sa mga sinehan, pasagdan lang diay sa mga otoridad nga dili sakmiton ang ilang mga kahimanan.
Tugotan ta nga lisensyado sila unya mangopya og salida nga hilas ug law-ay aron ibaligya ngadto sa publiko, pasagdan lang gyud diay sila sa kagamhanan kay may lisensya man?
Pero kun wala kini sila magbayad og buhis kay walay business permit, aw dili maayo nga palabungon sila dinhi.
Kini tungod kay gawas nga nakalapas sila sa balaod bahin sa pagpamaligya og mga kinopya nga salida, dili lamang sa mga hilas ug law-ay nga salida, apan labaw sa tanan unfair alang sa mga tag-iya og sari-sari store nga dali kaayong pasirhan sa kagamhanan kun mapakyas sa paglukat og business permit. Di ba?