Ang sakit kong kasinatian sa politika (Kataposan sa upat ka hugna )

Naangkon ko man ang kaparotan sa piniliay tungod sa pinalitay og boto, wa nako kini igsapayan bisan man tood og ako gisakitan. Ipadayon ko gihapon ang nasugdan na nakong krusada - nga makabaton og kausaban ang sistima sa politika dinhi sa ato ug ang kinatibuk-ang nasud. Wa gihapon ko magpakawala sa paglaum nga sa kataposan makab-ot ra gihapon nato kini.

Ang kadaugan sa usa sa among kauban sa pundok kausaban sa milabay nga bugnong lugaynon bisan og wala siya mamalit og boto, nagdasig kanako ug sa akong krusada sa pagtoo nga aduna gayoy kausaban ang atong sistima sa politika ug ang pagpili og mga mamahimo natong lider dinhi sa nasud. Gikinahanglan lang ang diyotay nga pag-antos ug pagpanglimbasog.

Sa milabay nga bugnong lugaynon akong nakita nga ang pipila sa mga tawo o mga botante mopili sa mga kandidato nga hingpit gayod nilang nailhan ang pagka tawo niini. Ako usab nga nakita nga ang mga botante mopili na og kandidato basi sa kaalam ug kahibawo niini. Apan subo lang tungod kay mas daghan pa gihapon kanila ang mga botante nga mopili og kandidato basi sa salapi nga ipalit ngadto kanila ug gamay ra usab sa mga makamao ang manggawas sa ilang panimalay aron mamotar.

Hinoon, dili nako sila mabasol sa pagbaligya sa ilang boto ug kun may basulon man ako, walay lain kun dili ang mga politiko ug ang ilang kasamtangang kahimtang o pagka butang.

Tungod sa kawad-on ug kalisod, gipahimudsan pagmaayo sa mga politiko ang kahimtang sa mga kabus. Ang kaubos ug kahibawo sa ubay-ubay nga mga botante gikabay-an pagmaayo sa mga mapahimudsanon nga mga politiko ug ang mga botante nga gipakasama lang duwa-duwa ang bugnong lugaynon maoy kanunay nga nabiktima.

Kini ang usa sa mga hinungdan kun nganong sa mga piniliay maoy mapili ang mga politiko ug dili ang mga lider nga mao gayod unta ang gikinahanglan sa nasud. Sa ako nang giingon kaniadto pa nga dako ang kalainan sa lider ug politiko. Ang lider maayo ug naglantaw sa kaayohan sa iyang katawhan samtang ang politiko tikasan, kawatan ug wa maglantaw sa kaayohan sa iyang ginsakopan.