Hapi-hapi sa dunay sapi

Kinahanglang mamutos nang daan si Cebu District Collector Ronnie Silvestre ug ang laing 79 ka mga empleyado sa Cebu Customs.

Kini sila siguro gayud nga maapektuhan sa Attrition Act of 2005 nga nagbuot nga kadtong mga opisyal nga dili makaabut sa ilang collection target tangtangon sa serbisyo human irekomendar sa Commissioner of Customs.

Giangkon na man gani ni Collector Silvestre nga imposible nga makab-ot ang ilang collection target nga P7.2 bilyones ning tuiga. Ila na lang kunong paninguhaon (bisan sa damgo lang) nga dili maka-abot og 7.5 porsiyento ang makuwang sa ilang koleksiyon aron makalusot sila sa Attrition Act.

Usa sa mga katarungan ni Silvestre mao ang pagminus sa imports sa mga negosyante dinhi sa Sugbo. Sumala sa akong duwende nga niislag na ang mga importers kay dagko man kaayo nga tongpats ang pangayoon sa mga buaya sa customs.

Atong bantayan kun ipatangtang ba gayud ni Commissioner Angelito Alvarez kining mga non-performing officials sa Cebu customs.

Wala kahay minilyon nga katarungan nga makapugong sa ilang pagkatangtang? Tingali’g tuloy pa ang hapi-hapi diha ha?

* * *

Makalipay ingon man makaguol kining balaudnon nga gipangamahanan ni Kongresista Tomas Osmeña nga gitawag og “Happy 8.”

Kining maong House bill magbuot nga ideklarar nga special non-working holidays ang Disyembre 25 ngadto sa 31 apil na ang Enero 1.

Gawas nga maghatag kini’g igong kahigayonan sa katawhan sa pagpauli ngadto sa ilang lungsod aron makauban ang ilang mga minahal sa kinabuhi ug mga higala, mo-ugmad usab kini sa mga gagmay’ng negosyo sa mga probinsiya kay mogasto man gayud kining mobakasyon.

Apan gutmon usab hinoon ang mga trabahador nga dili makadawat og sweldo kun dili motrabaho kon no work no pay laborers.

Nakasabut ako sa pagsupak sa mga dagkung negosyante niining maong balaudnon kay mominus man ang halin sa mga malls ug supermarkets ingon man ang produksiyon sa mga factories, apan maayo nga hatagan usab nato’g higayon nga mabuhi ang gagmay’ng negosyo sa probinsiya.

Taas ang hapi-hapi sa may mga bonus samtang dugay usab nga magkutoy ang tiyan sa mga wala’y sapi.

* * *

Kining pagkatudlo ni Engr. Nigel Paul Villarete isip Mactan-Cebu International Airport Authority (MCIAA) general manager nagpakita nga dili gayud mababagan ang gusto sa presidente sa pagtudlo og tawo nga molingkod sa usa ka posisyon sa gobiyerno.

Nagpakita usab kini kun kinsa ang mas paminawon ni Pres. Aquino tali nila ni Kongresista Tomas Osmeña ug Gobernador Gwen Garcia.

Maayo kining timailhan kay si Engr. Villarete nahadugang sa mga Sugbuanon nga gitudlo sa presidente sa dakung pwesto sa gobiyerno. Ang laing duha mao sila si Energy Secretary Rene Almendras ug DOTC Undersecretary Aristotle Batuhan.

Aduna pay daghang mga Sugbuanon ang naghangad ngadto sa Malacañang nga nagpaabut og appointment alang sa mga pwesto nga bakantihan sa mga tinudlo sa kanhi administrasyon.

Akong gihangop kining pagkatudlo ni Engr.Villarete kay nasayud ako sa iyang abilidad tungod sa among dugay nga pag-uban sa Regional Development Council (RDC).

Nag-alagad siya kaniadto sa Natioanal Economic Development Authority (NEDA) usa itudlo nga South Reclamation Project manager hangtud nahimo’ng Cebu City Planning and Development office coordinator. Graduate usab siya sa Asian Institute of Technology (AIT) sa Thailand ug dugay nga nag-silbi isip private sector representative sa RDC diin nahimo siyang chairman sa Mactan-Cebu Bridge Management Board (MCBMB).

* * *

Gusto ko hapi ka! Mao kini ang slogan ni Senate President Juan Ponce Enrile. Apan unsa man gayud ang tinuod nga makahatag og kalipay sa usa ka tawo?

Adunay mga senior citizens sa White Gold café nga ang kalipay mao ra gayud ang paghigop og kape samtang magdebate sa bisan unsang butang dinhi sa madanglog nga kalibutan.

Ang pag-komediahay ug kinataw-anay, sinubakan sa pag-awit (bisan og yabag) maoy gituhuan nilang nakapalugway sa kurayut na nilang kinabuhi.

Usa hinuon ka miyembro sa maong grupo nga kalmado kaayo mao ang akong kumpare, si Trans Daarol.

Dili siya moinum og ilimnong makahubog ug pinili usab ang iyang pagkaon. Dili usab siya mokuyog sa mga karaoke joints kay gisunod gayud niya ang sinultihan nga: “Early to bed and early to rise, makes a man healthy, wealthy, and wise.” Mao nga sapi-an ug hapi siya.

* * *

Usa sa mga mabulukon nga kalihukan sa pagsugod sa novena sa kapistahan sa Virgin of the Rule (Birhen sa Regla) sa Lapu-Lapu city mao ang fluvial procession. Himuon kini karong Nobiyembre 12.

Ang procession magsugod sa Pacific Cebu Resort wharf sa alas siete sa buntag ug muabot sa Muelle Osmeña mga alas nuebe sa buntag. Ang imahen isakay sa yatch nga gipanag-iya ni Lee Joseph Gonzales. Si Tourism Commission Chairman Damian Gomez inabagan ni Commissioner Naty Amores maoy nangulo niining maong relihiyosong procession.

Ang M/B Birhen sa Regla nga gipanag-iya sa Lapu-Lapu city maoy pasakyan sa mga sakop sa media. Alang sa libreng boarding passes tawga si Sunshine Alegre sa tel. nos. 341-1644 ug 583-6395.

* * *

Email:[email protected]