Ang sakit kong kasinatian sa politika (Ikaduha sa upat ka hugna)

Tungod sa di maayong kasinatian, gibiyaan nako ang bag-o ko lang gisudlan nga larangan sa politika ug gikondisyon ang huna-huna nga puyde ra gihapon kong makatabang sa akong isig ka tawo bisan og wala ko sa politika.

 Isip usa ka magtutudlo sa kolehiyo ug nagtudlo sa mga tinun-an nga nagkuha sa kursong Political Science; isip usa ka magsisibya sa Radyo ug kolumnista sa pamantalaan nasayran ko nang daan nga ang piniliay sa nasud pinalitay, gani kanunay nakong gipahimangnoan niini ang akong mga tinun-an nga naglaraw sa pagsulod sa politika. Apan kanunay ko usab silang gipasabot nga ang kadaugan nga nakuha gumikan sa pagpalit sa boto sa mga botante dili angayang ikapasegarbo ug angay gani nga ikauwaw tungod kay dili kinasing-kasing ang iyang pagkapili ug binayran ang iyang kadaugan.

Isip usa ka magtutudlo sa kursong Political Science wa ko magpakawa sa paglaum nga mahatagan pa og kausaban ang sistema sa politika nga dunot na. Kanunay nakong gipasabot ngadto sa akong mga tinun-an nga ang kausaban sa politika sa nasud anaa kanila ug kun mosulod man gyod sa politika kinahanglan sila ang mo-influencia sa paghimo og kausaban sa sistimang dunot ug dili ang mga trapo o traditional nga mga politician.

Kanunay nakong gisilsil sa ilang mga alimpatakan nga ang piniliay usa ka kahigayonan nga gihatag ngadto sa katawhan sa pagpili og mamahimo nilang pangulo o mga lider ug usa kini ka sagradong katungod sa tawo busa dili angayang yama-yamaan ug bugal-bugalan pinaagi sa pagpugos kanila ug pagpamalit sa ilang mga boto. Ako silang giingnan nga ang pinalitay og boto panahon sa piniliay mao ang hinungdan kun nganong nawagtang ang spiritu sa tinuoray nga pagserbisyo sa mga midaug ngadto sa mga tawo nga angayan gayod unta nilang serbisyohan ug alagaran.

 Ang pinalitay og boto panahon sa piniliay mao ang hinungdan nganong gipasagdan sa mga midaug ang batakang panginahanglan sa katawhan nga nagbotang kanila sa katungdanan.

 Ang pinalitay og boto sa piniliay mao ang hinungdan kun nganong ang pagpangalagad gihimo nang negosyo ug ang spiritu sa serbisyo nahanaw.

Human maangkon ang sakit nga kaparotan kaniadtong tuig 2004 nga bugnong lugaynon gibalikan nako ang pagpanibya ug gipadayon ang adbokasiya sa pag-usab sa sistema sa politika nga dunot. Gipalig-on ko usab ang adbokasiya batok sa ginadiling drugas ug korapsyon.