Nagsugod na ang Truth Commission

Sa atong pagsulat niini, wala pay ruling ang Korte Suprema kon constitutional ba ang executive order ni Presidente Noy nga nagmugna sa Truth Commission. Apan samtang naghuwat sa maong ruling, nagsugod na pag-review sa 23 ka kaso,lakip sa mga alleged irregularities sa miaging administrasyon.

Gipasalig sa Truth Commission nga mo-provide sila og protection sa mga informants ug mga testigo nga motabang pagpagawas sa kamatuoran. Ambut ngano nga duna may misaway ug mibatig kahadlok sa Truth Commission.

* * *

SWELDO SA MGA DRIVER. Pipila ka mga Kongresista misugyot nga hatagan og fixed nga sweldo ang mga driver sa mga public transportation. Niini nga paagi, matud nila, dili magpahaguros, dili maglumbaanay ang mga driver aron makaabang sa husto. Sa ato pa, kaminosan ang mga aksidente sa kadalanan.

Sa iyang bahin si Kongresista Elpidio Barzaga, Jr., sa Cavite, miawhag sa Department of Labor & Employment pagsuta sa mga working condition sa mga bus driver, kay matud pa: “their lack of sleep and rest between long trips could be a key factor in the rash of road accidents.”

Tinuod, kun kulang sa katulog, o kapoy ang lawas, wala pa kahuwasi sa kahubog sa miaging gabii, o giaway sa asawa – kining tanan makatampo sa mga aksidente sa kadalanan, bisag unsa pa ka-road worthy ang sakyanan. Maayo sad ning i-look into sa DOLE. Unsaon pagtino kun top condition ba ang usa ka driver, physically ug emotionally.

* * *

PAGPATAAS SA BUHIS SA SIGARILYO. Sa Amerika, gipatas-an ni Presidente Obama ang buhis sa sigarilyo. Ang salapi nga mahipos gumikan niini, gamiton alang sa health insurance sa kabus nga kabataan.

Gisunod kini sa atong nasud. Kini, for health reasons gihapon. Ang salapi nga mahipos gamiton alang sa health insurance program sa mokapin sa 5 milyones ka kabus nga Pinoy.

Mora mag dugay na tang nakadungog ini. Apan, nahilom man pod. Ngano man, kusog kaayo ang pressure gikan sa mga cigarette manufacturers? Pressure? Adunay mga 17.3 milyones ka smoker sa tibuok nasud. Ug kini buot panalipdan sa Department of Health gikan sa pagkasakit nga dala sa pagpanigarilyo.

Apan, pila lang kaha ka chain smokers ang mapugos pag-undang pagpanigarilyo kun patas-an na ang buhis niini? Matud nila, mas maayo pa konong mawad-an silag asawa kay sa mawad-an silag sigarilyo. Na, hala, sige!