EDITORYAL - Kakabus sa nasud prenohan

Masaligon ang kasamtangang administrasyon nga sulod sa umaabot nga lima ka tuig dili na moarangkada sa pagsaka ang gidaghanon sa mga kabus nga pamilya sa nasud.

Kini tungod sa gilusad nga proyekto sa gobiyerno nga mao ang conditional cash transfer (CCT) nga gigahinan og P21 bilyones sa kagamahanan alang sa unang tuig sa pagpatuman sa gitawag nga poverty reduction program.

Ang maong salapi dili ipanghatag nga cash ngadto sa mga kabus kundili gastuhon kini pinaagi sa Department of Social Welfare and Development sa paghatag og edukasyon sa mga kabus.

Sa laktod, paeskuylahon ang mga kabus nga kabataan aron makakat-on og maayong panginabuhi dili lamang sa negosyo kundili sa maayong trabaho.

Sumala sa pamahayag ni Kalihim Jose Eliseo Rocamora sa National Anti-Poverty Commission (NAPC) nga pinaagi ning maong programa tataw kaayo nga may preno na ang kakabus sa nasud o moungot na ang kasamtangang gidaghanon sa mga pobreng pamilya.

Maayo unta kun tinuod nga matuman kining gidamgo sa NAPC. Kay ang usa ra ba nga labing makapasamot sa kakabus sa matag pamilya mao ang pagdugang og anak.

Sumala sa survey sa miaging 2008, matag segundo, adunay tulo ka bata ang matawo sa nasud ug ning tuiga mikabat na sa 90 milyones kapin ang katibuk-ang populasyon sa nasud.

Sa tuig 2011 anaa na ta sa 100 milyones sa laktod gibanabana nato nga sa 2015 kun tag 10 milyones lay madugang sa populasyon matag tuig hayan nga anaa na ta sa 140 milyones.

Sa pagkakaron anaa sa 33 porsento ang gidaghanon sa mga pamilyang anaa sa gitawag nga ubos sa poverty line ug gituohan nga moungot kini kun dili moubos pa, bisan pa kun mosaka ang populasyon sa nasud.

Matuman man o dili, basta mao kana ang gitarget karon sa kasamtangang administrasyon. Bueno ato kining panid-an , pinaagi sa pag-ingon nga good luck.