Wa makasabot sa ilang gibati ang mga pasahero sa usa ka ferry boat paingon sa Leyte dihang ilang nakita ang usa ka tawo nga naghubo ug nakatuwangwang si for adults only. Ang mga pasahero nga nakakita naglibog kun unsa ang ilang himoon. Adunay kaluksuon sa dagat kay nahadlok, adunay milingiw samtang ang uban nagngisi nga nagtan-aw pero gitapin-an ang mata sa ilang pinabukad nga mga kamot
Kinsa bay di mahadlok nga ang tawo nga naghubo aduna may dala nga duha ka armas, armas nga kun mobuto makamatay ug makapabuhi. Kinsa bay dili molingiw ug mongisi nga puerte man gyod tawon kunong pagkabantanga ni for adults. Ang mga nakasaksi misugilon nga samtang giwara-wara sa tawo ang iyang armas nga 9MM midungoy man ang lain niyang armas nga wa nay “M” o walang malay o wa nay kusog.
Ang maong tawo polis diay nga nakadestino sa Medellin Police Station. Tungod sa grabing kahubog wa na makamatngon si PO2 Rodelo Pilapil Jr. sa iyang gihimo sulod sa usa ka ferry boat paingon sa Leyte diin siya nagpaso-paso nga wa nay purol ug brep. Gipuhalan sa polis si Tarzan nga nagbahag ug ang mga sakop sa Alpha Phi Omega nga kun mag oblation run magtabon sa ilang mga nawong.
Hinoon nakadayeg ko ni PO2 Pilapil Jr. tungod kay didto gyod niya gisulod sa tiyan ang iyang giinom kay kun nahitabo pa nga didto gisulod sa ulo sa polis ang iyang giinom wa hibaw-e og nang-hostage na siya. Tungod sa kadaghang ilimnong makahubog nga nasulod sa tiyan sa polis wa na makaagwanta ang iyang purol ug brep nahubo na.
Unsa kaha tawon ang gibati ni Senyor sa gihimo ni Junior.
Kining atong mga polis sa lalawigan sa Sugbo nasagulan gyod og mga bilyako. Kun dili magdulog sa suka ug manghikap og totoy sa babaye; magsumbagay kay wa maklaro ang pagbahin sa tong sa tigbakay ug kun di man gani, magpaso-paso sa barko nga walay purol ug brep. Naunsa na ni oy!
* * *
Maayo diay nga pagbasa ning akong lindog sa akong classmate nga si pareng Joram Alatraca nga kanunay nga nagsunod sa AMBOT LANG dinhi sa Banat News. Ug kaninyong tanan nga nagbasa og Banat News daghang salamat.