EDITORYAL - Dugang 2 ka tuig sa edukasyon

Ang sugyot nga dugangan og duha ka tuig ang Basic Education Curriculum (BEC) bug-at kaayong hunahunaon sa tanang mga ginikanan ilabi na ang mga nag-ilaid sa kalisod sa panginabuhi.

Mao man gani nga kun maghisgot na ta og edukasyon, dili na usab kalikayan nga matukbil ang isyu bahin sa pagkontrolar sa pagpanganak aron dili bug-at ang pagpas-an sa pagpa-edukar niini.

Sumala ni Kalihim Armin Luistro sa Edukasyon ang Pilipinas ra ug Myanmar maoy nagpabiling duha ka nasud sa kalibotan nga nagpatuman sa napulo ka tuig nga BEC.

Buot ipasabot nga biya diay ug ulahi kaayo ta kun itandi sa ubang kanasuran, ug maayo nalang kay nakasugakod ta hangtod karon.

Ang paghatag og edukasyon sa anak, usa ka sagradong katungdanan sa ginikanan.Walay anak nga nagpakatawo kay nagkinahanglan sila og ginikanan, kundi ang ginikanan maoy nangita og anak.

Ang anak dili lang kay usa ka dayandayan sa panimalay kundili usa ka dakong obligasyon ug pas-anunon sa ginikanan.

Tungod kay ang anak kinahanglang pakan-on, bistehan, atimanon ang panglawas ug labaw sa tanan hatagan sa edukasyon.

Kun gipakatawo nimo ang imong anak aron lamang sakiton, pinaagi sa dili paghatag og hustong edukasyon, pagkamakaluluoy sa usa ka kalag nga wala gyud mangandoy nga ikapakatawo sa kalibotan aron lamang paantuson.

Mao man gani tingale nga ang atong mga tinahod nga kaparian ug mga madre wala magtuga-tuga sa pagpanganak kay dili sayon ang responsibilidad sa usa ka ginikanan ngadto sa anak.

Ilabi na karong giplano na sa gobyerno nga pun-an og laing duha ka tuig ang BEC mosamot kabug-at ang pagpalampos og kurso sa mga anak, ilabi na sa mga kabus nga mga ginikanan.