Si Dodong Joavan

Diosnon kuno si Joavan Fernandez?

Motuo mo?

Apan mao kini ang giinsister ni Joavan sa balita sa usa ka pamantalaan.

Sumala pa’ng Dodong Joavan nga dili kuno siya “adik-adik” taliwas sa pagtuo sa kadaghanan nunot sa iyang pagkalambigit sa mga kagubot.

Maayo unta og puy-an ni Joavan ang iyang pagka-Diosnon.Dili na siya manion.

Dili na siya manghulga.

Dili na siya malambigit sa kagubot sa kadalanan.

Apan labaw sa tanan, dili na usab niya panghimakakon ang mga polis nga nag-monitor kaniya.

Kay sa higayon nga mahibaw-an nga “press release” lang kining iyang pag-ingon nga buotan siya ug Diosnon siya, tanang nakaila kaniya tungod sa iyang kamaldito mangagho ug motulisok aron pagkonpirmar unsa siya nga klaseng pagkatawo.

Kun mahibaw-an nga namakak si Joavan, manubag usab sa publiko hasta si Mayor Socrates Fernandez sanglit dili layo ang posibilidad nga ang nagsagop kaniya nga nagtabontabon sa iyang mga sala sa komunidad kaniadto maoy nagtudlo kaniya pagsabwag sa sayop nga balita: nga siya usa ka Diosnon ug dili siya adik-adik.

Ang tawo nga tarong dili na manistil pa isabwag sa tibuok kalibutan ang iyang pagka-relihiyoso ug pagtuo sa Dios tungod kay makita kini sa binuhatan lamang kun iya bang gipuy-an ang gipanudlo sa iyang relihiyon.

Salikwaot kaayo paminawon nga si Mayor Soc maayo kaayo mobatbat sa mga pulong sa Dios ug makaagni og mga kalag nga mobalik na ngadto sa sabakan sa Ginoo diha sa Ebanghelyo, apan wala gani maka-agni sa iyang pinalanggang sinagop nga motuman sa balaod.

Hinuon, dili nato panghimarauton si Joavan niining iyang pangangkon nga usa siya ka relihiyosong tawo ug wala siya maggamitan og drugas.

Apan nganong bag-o lang siyang nalambigit og kagubot?

Gi-alarma siya sa kapolisan tungod kay nagdaladala og armas sa Mango Square.

Sa dihang gibabagan sa blocking force sa kapolisan, ang iyang bata-bata ang nadakpan nga nagmaneho sa Toyota Revo nga iya sa city government sa Talisay. Wala kini trip ticket.

Aron pagluwas sa kapalpakan sa mga opisyal sa Talisay pagbadlong sa mga kauban ni Joavan sa kabuang nga manggamit og sakyanan sa gobyerno nga walay pananghid, giangkon si Benedict Gabasa nga job order employee sa kagamhanan sa Talisay. Ning hitaboa, hasta na ang mga opisyal sa Talisay mi-apil na og dupa kang Joavan.

Mao usab kini ang problema diha sa Talisay, sila nga anaa sa administrasyon mipatid sa usa nila ka kauban nga si Konsehal Val Yllanan aron mataktak sa partido administrasyon.

Gamay kaayong problema kining gituohan nila nga si Val adunay special operations niadtong miaging election kay lagi wala mogasto alang sa pagpadaog sa duha nila ka kauban nga nangapilde.

Apan inay kanang problema ni Joavan nga magpatuyang lang og gamit sa sakyanan sa gobyerno nga walay pananghid ug gamiton pa gyud sa binuang, kanang pamolitika na hinuon sa konseho ang giatubang.

Bise Mayor Alan Bucao, aksiyoni kuno ninyo kining problema ni Joavan nga nakadamay sa Talisay. Undangi una nang pamolitika, layo pa ang 2013.