Island Experience sa Lapulapu

Usa ka maayong programa sa kagamhanan sa dakbayan sa Lapulapu ang Island Experience. Kining maong programa gihimo aron pagsabwag sa mga lokal nga mga bakasyonista sa paghangop sa barato nga package aron makasuroysuroy sa mga nindot kaayong mga beach resort, isla ug diving site sa isla sa Mactan.

Niadtong Biyernes gibuksan ang Island Experience pinaagi sa usa ka programa sa Imperial Palace ug didto gi-showcase ang nagkadaiyang mga suroyanan nga makalingaw ug makahatag og relaxation sa buot mosuroy ug mobakasyon ning panahona.

Ug niadtong Sabado, gisinati sa mga sakop sa media sa Cebu ug Davao ang kaanindot sa inahang kalikupan nga nagpalibot sa isla sa Mactan pinaagi sa pagsuroy sa isla sa Caohagan, sakop gihapon sa dakbayan sa Lapulapu.

Makatandog ang pamulong ni Mayor Paz Radaza atol sa pagbukas sa Island Experience sa dihang gipasalamatan niya ang hostage crisis sa kauluhan nga maoy nagtukmod sa kagamhanan sa Lapulapu ug sa industriya sa turismo sa siyudad pagmugna og ingong klaseng programa pagdani sa mga lokal nga turista paghangop sa baratong mga tanyag.

Ang industriya sa turismo maoy nakapahimong malambuon sa Lapulapu. Ug dinhi nagsalig sa buhis ang kagamhanan dinhi.

Apan sumala pa ni Mayor Paz nga wala lamang magkolekta og buhis ang kagamhanan sa dakbayan sa Lapulapu, kun dili nagpanday kini og mga programa aron maprotehian ang interes sa industriya sa turismo, ilabi na sa panahon sa krisis sama sa nasinati karon.

Maayo usab nga hinuklogan sa mga “tourism partners” sa pribadong sektor ang hagit ni Mayor Paz sa paggama pa og maayong mga atraksiyon sa mga bisita ginamit ang Lapulapu isip destinasyon. Kini aron makalupig sa ubang lugar nga nanghambog na usab nga adunay white sand beaches, world class hotels ug resorts.

Kun magkahiusa lamang ang kagamhanan sa dakbayan sa Lapulapu ug mga stakeholders sa turismo sa isla sa Mactan, nagtuo ko nga ma-apsan pa ang ubang mga destinasyon sa nasud.

Ang mga maanindot nga white sand beaches ug resorts ug ang kaanindot sa mga isla nga mahimong kasuroyan dili pa gihapon hitupngan. Ang pagka-maabi-abihon sa mga Cebuano nga mga kawani sa hotel ug ubang destinasyon sa Mactan usa usab sa ikapanghambog nato nga malisod hikit-an sa ubang mga destinasyon sa nasud.

Sa mga suroyanan sa Cebu, ang isla sa Mactan gihapon ang gusto kaayong balikbalikan namong mga lokal nga bakasyonista ug sa mga turista gikan sa laing lugar sa nasud ug gawas sa nasud.

* * *

Husto kining obserbasyon ni DILG-7 regional director Pedro Noval Jr. nga dili makatabang sa mga polis, bombero ug jail guard ang 24-oras nga trabaho ug duha ka adlaw nga day-off ug labaw nang dili kini makatabang sa publiko.

Imposible kaayong nagbuka ang mga mata sa mga polis, bombero ug jailguard sulod sa 24-oras nilang duty.

Apan kun tinuod nga matulog usab sila sa tungatunga nianang 24-oras, usik ang gisuweldo kanila sa mga oras kanus-a sila natulog. Dili kini makaayo sa lawas ug adunay namatikdan nga moresulta hinuon kini sa dili maayong praktis sa polis, bombero ug jailguard nga makahigayon og bisyo sama sa inom ug babaye.

Maayo tingaleng usbon kini. Sama pananglit sa pagpa-ubos sa gitas-on sa oras sa duty aron mahimong epektibo sa serbisyo.

Ayaw una’g hukmi ang Truth Commission

Ni Antolin dela Serna

Una, miingon sila nga unconstitutional ang pag-create sa Truth Commission, bisan kun sa unang administrasyon duha ka susamang commission ang gimugna, apan wala sila moreklamo, kay ila man.

Ikaduha, miingon sila nga walay ngipon, walay police power, dili maka-subpoena, dili maka-imbistigar, dili makahukom, ug dili makapa-priso ang Truth Commission.

Ikatulo, miingon sila nga di kasaligan si kanhi Chief Justice Jun Davide kay tawo ug suod ni Kongresista Arroyo.

Taliwala niining maong mga apprehension, atong makita nga nahadlok sila sa Truth Commission. Nganong mahadlok man sila? The Truth Commission is but a fact-finding body. Hadlok diay sila nga mapagawas ang truth?

Alang nako, atong huwaton unsay labok ni Davide ug sa iyang Commission. Dili una nato sila hukman. Kay kinsa man sad tang mohukom? Pagka-assuming sad god nato!

* * *

Delicadeza. Atong kutloon si Chit Roces sa iyang sinulat : “ Delicadeza is a Spanish word that denotes the proper treatment of what is delicate or fragile. In Philippine usage, it has come to embrace a host of virtues: honesty; respect of women, elders and authority; propriety, specifically knowing one’s place in a given situation; considerateness; and general good form.”

Mao kini ang delicadeza. Ug matud pa, wala na kini sa atong kultura karon, gipulihan sa pagka-garapal … pabaga sa nawong. Mao kini ang dakung problema ni Prisdente Noy pagsulbad sa corruption, tungod kay wala na kitay dalicadeza, wala na kitay mga uwaw.

Sa ato pa, maoy unahon ni Noynoy ang pagpabalik sa delicadeza sa atong kultura, and everything will follow. Mas lisud no?

* * *

Cellphone. Maayong pagkagusbat, wala na mahitsura ang awto ni Shiela Generoso sa dihang nabanggan kini sa train pag-cross niya sa railroad tract sa Pandacan, Manila. Nganong wala man siya mahibalo nga dunay approaching train, ug nganong wala man siya makakita sa nag-signal pagpahunong kaniya? Nag-istorya siya sa cellphone. Mao ni ang giingon nga using cellphone while driving may be hazardous to your health and dangerous to your life.