Pulis ang problema

Masulbad gyud tinuod ang problema sa illegal nga sugal sama sa jueteng didto sa Luzon ug masiao dinhi sa Sugbo kun himuon nga legal ang operasyon niini kay unsa pa may dakpon sa polis kun gitugot na ang operasyon.

Apan ang pangutana mao ba ni ang sulbad nga atong gipaabot nga himuon sa gobyerno? Kun sa matag higayon nga mapakyas ang mga ahensiya sa atong gobyerno pagsanta sa pagkuyanap sa usa ka illegal nga kalihukan ato nalang himuong legal aron dili na maglabad ang ilang ulo nabalaka ko nga moabot ang panahon nga moingon ang mga opisyal nga itugot nalang pud nato ang negosyo sa drugas aron makakolekta og buhis ang gobyerno.

Kun atong pasumban ang rason ni Kongresista Elpidio Barzaga sa iyang pagduso sa House Bill 3289 nga nagtinguha pag-legalize sa operasyon sa illegal nga sugal dili imposible nga mahitabo ang akong kabalaka.

Tiaw mo nga aron kuno makakolekta og dugang buhis ang atong gobyerno mas maayong himuon nalang nato nga legal ang jueteng ug masiao. Sa ingon niini masulbad na sab ang korupsiyon diha sa kapolisan tungod kay gipasanginlan man ang kapolisan ug ubang opisyal sa gobyerno nga nagdawat og suborno gikan sa mga operators sa illegal nga sugal.

Ambot unsay sala sa taga Cavite nga nakaangkon og kongresista nga bugok sama ni Barzaga. Inay iyang pakusgan ang balaud nga magsilot niadtong mga opisyal nga masakpang nagprotehir sa mga illegal himuon naman hinuong legal.

Nahibawo man ta unsay problema nganong dili masanta ang illegal nga sugal. Kini maoy angayan nato nga hingusgan. Angayang mangita og paagi ang gobyerno unsaon nga masakpan ang mga protektor diha sa han-ay sa kapolisan.

Usa sa mga paagi nga alang nako epektibo, kadtong gihimo ni kanhi PNP Chief Panfilo Lacson kaniadto. Kun seryosohon lang pagpatuman ang “one strike policy” buot ipasabot nga ang opisyal sa kapolisan sa usa ka dapit nga masakpang dunay illegal nga sugal sa iyang area of jurisdiction tangtangon ug kasohan, segurado ko nga matul-id ang kapolisan.

Pananglitan dinhi sa dakbayan kun dunay taga lain nga dapit nga mohimo og operasyon dinhi unya makumpirmar ang presensiya sa illegal nga sugal taktakon dayon ang hepe ug pasakaan og kaso. Syaro og dili magkinto ang atong mga opisyal.

Unsaon man gud nga kuwang man sa lihok ang kapolisan. Niining maong sitwasyon tulo ray buot ipasabot niini, posibling tapulan lang gyud sila o ba kaha nagdawat sila og protection money sa mga operators hinungdan nga di gyud sila makabadlong ug ang ikatulo hadlok sila kay dagkong opisyal ang nagpaluyo.

Labi pa kun ang hepe gyud mismo sa kapolisan sa tibuok nasud, regional director, provincial o city director ang protector o ba kaha operator gyud. Diha sa Argao pananglitan sibaw kaayo ang report gikan pa gani sa ubang sakop sa kapolisan nga dunay konsehal sa lungsod nga operator og masiao.

Apan nganong dili man nila madakpan ang maong konsehal? Ilang palusot nga lisud kuno pangitaan og ebidensiya. Tinuod lisud og magpasinaw lang mo sa bangko. Pero og motrabaho mo sa madugay ug sa madali inyo ra gyud nang madakpan.

* * *

[email protected]