Bati nga batasan

Dili g’yud ko malimot sa panultihon nga sagad balik-balikon ni Mayor Michael Rama nga kadtong mga tawo nga dili makamao molingi sa iyang gigikanan walay katungod pagsud-ong sa bidlisiw sa adlaw.

Duna man go’y pipila ka tawo nga moyamiid sa mga dapit nga iyang gigikanan nga nakatabang pag-agak kaniya nga siya moabut sa iyang nahimutangan karong panahona.

Aw hinoon, lahi-lahi man ang batasan sa usa ka tawo. Sa akong bahin, gipasigarbo nako ang DYMF Bombo Radyo nga kaniadto mao pa ang Radyo Vigilantes kay diha ako nabansay sa pagpanibya.

Bisan og wala ko makagusto sa mga tawo nga nagdumala kaniadto sa maong sibyaanan, apan ang mao nga sibyaanan kanunay nako nga gihandom ug giyukboan.

Duna man go’y usa ka broadcaster nga daw miyaga-yaga sa sibyaanan nga diha siya kaniadto nagsugod pag-broadcast sulod lang sa pipila ka buwan.

Kun wala siya pabansa pagsibya sa iyang maestro dili tingali madunggan sa kahanginan ang iyang tingog.

Nakadungog man gud ko nga ang maong tawo nga naghinambugero na karon, miingon nga ang maong sibyaanan nga kaniadto siya nagsibya, “taga bukid” ra ang maminaw.

Wala tingali siya magbasa sa report sa mga mantalaan dinhi sa Sugbo nga ang maong sibyaanan nga iyang gisaway usahay anha gani magagikan ang mga balita sa tulo ka mantalaan kay sa ubang sibyaanan.

* * *

Nanggawas na karon ang mga report sa gitoohang anomaliya sa pipila ka financial transactions sa kagamhanan sa dakbayan sa Sugbo.

Gikan sa pagmugna og mga infrastructure projects, ngadto sa pagpamalit og mga fire extinguishers, pagpamalit og mga bugas-humay nga gihatag sa mga opisyal ug kawani sa kabarangayan.

Mas maayo usab tingali nga susihon kadtong pagpamalit og mga collapsible tents kon mga tulda sa City Hall nga ang usa P25,000.

Pastilan, sigurado g’yud ko nga ang maong mga collapsible tents mahal ra kaayo. Kadto bang yellow gani ang kolor.

Ang mga gagmay’ng tubo nga puthaw nga gigamit isip mga haligi sa tulda o sa laktud mga frames, dili mokantidad og P10,000. Labaw na nga dili mokantidad og P15,000 ang nipis kaayong plastik nga gigamit isip atup.

Aw bisan gani ang mga sakyanan nga gipangpalit sa City Hall nga sama sa police vehicles ug trak de karga, mahal ra kaayo uy.

Naay mga sakyanan diha nga gipalit sa dakbayan alang sa police nga kantidad og P485,000 nga mahal ra gayud kaayo.

Sigurado man ko ba nga duna g’yoy nakakwarta sa maong mga transaksyon.

Unya, ang kanunay nga makakuha sa proyekto mao ra g’yud ang Pasahero Motors, ngano man na? Mangutana lang ko kay daghan g’yud ang nagduda.

* * *

Atul sa tigum sa CITOM Board karong buntag, hisgutan nila kun angay ba gayud nga hugtan pagpatuman ang pagdili sa mga gagmay’ng bata pagsakay og motor dinhi sa dakbayan.

Kami hinoon si Mayor Rama, aw bisan si CITOM chairman Jack Jakosalem, dakung supak sa tinguha sa kapolisan.

Mangutana mo og ngano? Daghan kaayo ang apektado niini ug sila mao kadtong nanagpuyo sa mga dapit nga walay mga PUJ nga nagbiyahe.

Kun imong tan-awon ang statistics, gamay ra kaayo ang mga hitabo nga naglambigit og motorsiklo nga dunay mga bata nga nagsakay.

Ang daghan mga motor nga gisakyan og mga hambugero ug walay disiplina nga drayber. Ang mga tawo nga magpasakay sa ilang mga anak sa motor kalma mopadagan.