Si San Socrates ug San Joavan

Si Santa Monica nahimong santa tungod sa iyang pag -antos ug pag-agwanta sa badlungon iyang anak nga si San Agustin. Si Santa Monica wa gyod magpakawala sa iyang paglaum nga mahimong katoliko ang iyang anak nga pagano. Sulod sa 17 ka tuig giagwanta ni Santa Monica ang kabadlungon ni San Agustin.

Si San Agustin nahimo usab nga Santo tungod sa pag-usab sa iyang kinabuhi. Gikan sa iyang pagka badlungon nahimo siyang buotan, nahimo pa gani siyang pari ug obispo, nahimong magsasangyaw ug nahimong santos.

Si Mayor Soc Fernandez relihiyosong tawo ug usa sa tigpanalipod sa mga pulong sa atong simbahang katoliko apan nakasagop siya og puwerte ka badlungon. Maghilak ang adlaw, semana ug buwan kun dili magpabadlong si Joavan. Sa iyang pagpabadlong kanunay usab siyang giduphan ni Mayor Socrates Fernandez ug labing seguro apil na niini ang pag-ampo ngadto sa daghang mga santos sa kalangitan.

Ning iyang pagsige og dupa sa iyang anak-anak, dili kaha ambisyon ni Mayor Soc Fernandez nga mahimo usab siya nga santo. Ambisyon usab kaha ni Joavan Fernandez nga himoon niyang santo ang iyang ama-ama? Porbida no? Kun ugaling mahimo man nga santo sila si Mayor Soc ug dodong Joavan seguro magkatawa sila nga magtan-aw sa ilang mga kritiko nga magluhod-luhod na unya sa ilang atubangan kay magpakitabang.

* * *

Karong adlawa kasumaran sa pagpaubos ni kanhi pangulong Marcos sa tibook nasud ngadto sa Martial Law. Tungod sa Martial law gi-huwes de kotsilyo ni Marcos ang mga tawo. Sa sinugdanan iyang nadisiplina ang mga tawo pero sa kadugayan siya na ang miabuso. Gumikan sa iyang pag-abuso gihukman ang kanhi pangulo ug ang iyang katigayonan nga pabayron sa iyang nahimong biktima apan hangtod karon wa pa gyod tawon makadawat sa ilang bayad ang mga biktima sa pagpangabuso ni pangulong Marcos.

 Apan nangamatay na lang sa pagpinaabot ang ubang biktima sa pangabuso ni Marcos wa gihapon sila makadawat niini hangtod nga nalimot na lang upod hinoon sila sa gihimo ni pangulong Marcos kay ila namang gipamalik sa gahom sa gobyerno ang mga Marcos.