Ombudsman ang mabasol sa pagpang-hostage

Bugbog sarado na ang mga police Manila tungod sa ilang paghimong kataw-anan sa nasud sa Pilipinas sa tibook kalibutan. Ang mga tigpahumot sa Malakanyang nagkapuliki upod sa pagdepensa sa ilang amo nga si Pangulong Noynoy Aquino tungod sa pagka-tagolilong niini sa hitabo ug tungod sa iyang pahiyom samtang mibisita sa nahitaboan sa hostage-masaker. 

Aron mapakalma ang mga taga Hong Kong sa ilang kalagot sa Pilipinas tungod sa hitabo nagkalain-laing imbestigasyon ang gihimo karon sa atong kagamhanan.

Samtang tuo ug wala ang imbestigasyon nga giatubang sa mga Police Manila nga nalambigit sa hostage-masaker nataligam-an sa mga imbestigador ug Senado ang tulobagon sa buhatan sa Ombudsman nga nagyakang natulog sa Motion for Reconsideration nga giduso sa nang-hostage ug nangmasaker nga si Sr. Insp. Rolando Mendoza.

Sigon sa mga kauban ni Mendoza nga human nila madawat ang decision sa Ombudsman nga nagtang-tang kanila sa katungdanan sa miaging tuig, gisang-at dayon sa ilang mga abogado ang Motion for Reconsideration ug kun ugaling ibasura man kini sa Ombudsman maoy ilang laraw ang pagpaabot niini ngadto sa Court of Appeals o ba kaha sa pinakataas nga hukmanan.

Matud pa sa mga kauban ni Mendoza nga siyam na ka bulan nga giyak-an ug gikatulgan lang sa Ombudsman ang Motion for Reconsideration nga ilang gisang-at. Tungod sa kalangay sa pag-irog sa ilang kaso apektado kaayo si Mendoza kinsa gikatakdang magretiro na unta sa pagka police sunod tuig. Ang mga kauban ni Mendoza nga nahinabi sa GMA News nagtoo nga mao kini ang hinungdan sa iyang pagpang-hostage.

Miresulta na ang pagka langayan ug ang pagkahingatulgon sa buhatan sa Ombudsman. Ang ako no og adunay mang-hostage dinhi sa ato tungod kay ang kaso sa CICC nga naglambigit ni Gobernadora Gwendolyn Garcia nga mag-upat na ka tuig wa pa gihapoy resulta!

Kun aduna may laing mabasol sa hostage-masaker nga nahitabo nga nagbutang sa nasud sa kauwawan sa tibook kalibutan kana mao ang Ombudsman. Ang kamatayon sa walo ka mga Hong Kong nationals ug pagkaangol sa lain pa niining kaubanan nga mihaling kanila og kasilag kanatong mga Pinoy makapahigmata ug makapaamgo na unta sa mga taga Ombudsman. Maamgohan na unta sa Ombudsman nga dili gayod magbunga og maayo ang pagkahingatolgon ug pagka langayan.