Di lang diay kami

Usa ka makalilisang ug madugoon nga panghitabo niadtong Agosto 23, 2010 didto sa kaulohan diin daghang mga kinabuhi ang nakalas lakip na niini ang kanhi pulis nga maoy responsable sa pag pang-hostage sa mga turista nga buot unta mag relaks relaks dinhi sa nasud.

Apan ang usa ka bakasyon unta, nahimo naman hinoong trahedya. Daghan ang mitulisok sa ilang mahusganong tudlo ngadto sa atong kapolisan ug sa mga tawo nga responsabli sa maong hostage drama. Gani hasta si President Noynoy nagkamuritsing sa wala ug tuo nga mga pagsaway ug daw dili na matulon nga insulto. Tinood, makaingon kita nga dunay lapso ang maong operasyon.

Labaw sa tanan duna pa unta'y mga mas maayo pang lakang nga mahimo kun duna'y saktong plano, mga modernong ekipo ug hustong training atong kapolisan nga mi-handle sa maong krisis.

Apan igo nalang siguro nang mga panghimaraot ug pagsaway ug panahon na siguro nga atong saktohon ang sayop, panaminan ang mga bolyaso ug suportahan nato atong kapolisan.

Nalipay ko sa dihang akong nabasa kining mensahe sa akong higala nga pwerteng kadismaya niya sa mga polis, media ug lakip na sa Presidente. Ug mao kini iyang mensahe: “I'm done, blaming the police, done calling the media stupid, done castigating the president. I now choose to embrace the lessons we've all learned from this tragedy. Wallowing in defeat and frustration will get us nowhere. True the wounds are still fresh, and they will take time to heal, but I'm moving on. I will not be held HOSTAGE by this sad episode of our history.”

 Tinood dako kaayo kadtong tamparos sa katakos sa atong kapolisan ug sa mga negosyador nga bisan pa sa ilang tinud-anay nga serbisyo nahisugamak na hinoon sila sa grabeng pagsaway. Apan ato bang natugkad ang tinood nga problema sa maong usa ka palpak nga operasyon?

Nagtoo ko nga kaming mga bombero lang ang nagsige og reklamo sa kakuwang ug ka karaan na sa among mga ekipo. Sama pod diay namo, hasta pod diay ang elite nga unit sa atong kapolisan ang SWAT nagkinahanglan pod diay og moderno ug bag-ong mga kahimanan.

Sama nila, naka-experience pod kami sa mga pagsaway ug batikos sa halos tanan namong sunog nga respondehan. Sama sa atong kapolisan nagkinahanglan usab inyong kabomberohan og moderno ug bag-ong mga kahimanan.Apan duna ba'y aksyon o positibong  tubag sa among mga yangungo?

Sa tinood lang, wala pa gyud intawn. Hinaut nga ang maong trahedya mamahimo unta natong kapanaminan ug makakuha unta kita og dakong leksyon niini.ug duna unta'y mga konkretong lakang nga himoon dayon ang atong gobyerno ug dili na unta kini langanon pa. Panahon na siguro nga wagtangon kining mentalidad sa Pinoy nga ayha pa manguros kun naigo na sa kilat. Sa kataposan, akong mga pahalipay sa tanang taga Alcantara, Cebu sa ilang fiesta karong adlawa in honor sa ilang patron, San Agustin. Happy Fiesta!!!