Kredibilidad.
Dinhi gihikot ni Senador Jinggoy Estrada ang iyang pagpangugat sa hawanan sa Senado pagkuwestiyon sa pagpangulo sa Sugboanong kanhi Supreme Court chief justice Hilario Davide Sr.
Matud ni Sen. Estrada, walay kredibilidad si Davide pagpangulo sa Truth Commission nga gitukod ni Pres. Benigno Simeon Aquino III tungod kay matud niya usa ang kanhi chief justice sa responsable sa pagpalagpot sa iyang amahan nga si kanhi Pres. Joseph Estrada, nagpapanumpa sa kanhi bise presidente Gloria Arroyo hulip sa iyang amahan, ug ang mga anak niini nalambigit og mga transaksiyon sa hudikatura nga ginamit ang pundo niini.
Sa dili pa mogamit si Sen. Estrada sa pulpito sa Senado aron pagsaway ni Davide, maayo tingaleng manamin siya ug unsa siya kaniadto; ug maayo tingaleng kolektahon niya ang kabag-on sa mga dokumento nga naglambigit sa iyang pamilya sa nagkadaiyang binuang sa dihang presidente pa ang iyang amahan.
Dili mahimong pakasad-on ni Sen. Estrada si Davide kun nalawgaw ang dagan sa impeachment trial batok sa iyang amahan. Mahimo niyang sunogon ang 1987 Constitution kun gustohon niya tungod kay ania dinhi nahipatik nga ang chief justice gyud sa Supreme Court ang molingkod nga chairman sa impeachment court nga lingkuran sa mga senador isip mga hurado. Ug bisan sa iyang pagdumala subay sa lagda, adunay mga huradong higala sa iyang amahan nga milampos paglawgaw sa proceedings pinaagi sa pagbabag sa pagbukas sa Jose Velarde envelope.
Ug kun dili pa ingon kahakog ang iyang amahan sa kuwarta gikan sa jueteng, dili maabot sa Senado ang reklamo sa kalapad sa maong sugal sa nagkadaiyang lugar sa nasud, nga miresulta sa impeachment complaint batok kaniya. Ug nga dili mogawas ang ngalan “San Juan Mayor Jinggoy Estrada” nga usa sa nagdawatan og “tong” gikan sa mga jueteng lords sa kauluhan.
Ang pagkuwestiyon ni Sen. Estrada sa mga kontrata nga nagunitan sa mga anak ni Davide usa ka isyung dugay nang nasirad-an sa dihang napakyas ang tinguha nilang kanhi Kongresista Gibo Teodoro, Ace Durano ug uban pa nga ipa-impeach ang chief justice niadtong higayona human nag-rally alang kang Davide ang mga Pilipino.
Angayang timan-an ni Sen. Estrada nga kun manaway siya sa laing tawo, angayan niyang seguruon nga dili usab siya ug ang iyang pamilya labaw’ng sawayonon.