Modus ba kini?

Nagduda ko nga dunay modus ang ubang kawani sa mga pribadong ospital aron mapugos gayud ang ilang mga pasyente nga adto magpa-admit sa private rooms.

Kaniadtong Lunes sa gabii, gidala namo sa Chong Hua Hospital ang duha nako ka anak, 13-anyos ug nueve-anyos, kay duha na ka adlaw ang hilanat.

Human makuhai og Complete Blood Count, mihukom ang mga doktor nga ipa-admit ang akong usa ka bata.

Kay duna man lagi mi’y insurance, Medicard, wala ko mabalaka. Ward ra hinoon ang libre namo nga ma-avail.

Apan didto sa admitting section, giingnan kami sa personnel on duty nga wala’y bakante sa ward.

Ang-ang man usab og mobalhin pa kami og laing ospital nga magsugod na usab kami sa uno. Halos lima ka oras kami sa emergency room usa mahuman pag-atiman.

Mao kadto, napugos tawon ko pag-uyon nga adto na lang sa private room apan gihangyo nako ang personnel sa admitting section nga i-note nga mobalhin ko sa ward kun may bakante na.

Apan miabot na lang ang lima ka adlaw, wala gayud kami pahibaw-a nga may bakante. Ngano man kini? Dili ba kaha gituyo kini aron lang gayud modaku ang bayranan?

Kun sa private room gud, P600 ra ang abagahon sa among health care company sa Room accommodation ug kay P1,700 man ang ilang private room, nagpasabot nga ako ang mobayad og P1,100 ang matag adlaw. Kun kwartahan pa ko, dili tingali ko moreklamo apan daghan baya kami nga mga kabus nga maapektahan kun ingon niini ang inyong himoon kanunay.

Siyaro na man pod, sa lima ka adlaw namo nga pag-estar wala g’yuy bakante sa ward? Dili na usab kini katoohan uy.

Kini ra ba’ng Chong Hua Hospital apil kini sa mga ospital dinhi nga wala mobayad og business tax sa dakbayan sa Sugbo.

Apan tan-awa kun barato ba ang ilang bayranan. Sa serbisyo wala ko’y ikasaway, gani sa nangagi nako nga lindog gidayeg man nako ang maong ospital tungod sa nindot nila nga serbisyo.

Ang gireklamo nako kini ra g’yud nga ingnon ka dayon nga walay bakante ang ward apan mogawas ka na lang dili ka gihapon mabalhin.

Ang mga sama gud namo nga pobre, mapugos na lang nga maadmit sa private room ang pasyente sulod sa usa ba ka adlaw, apan dili kay hangtud mogawas na lang.

Karon, paita g’yud, ang akong budget sa pagkaon ug ubang gastohan naibanan tawon kay daku ko og bayranan sa private room.

Palihug lang mga tagdumala sa Chong Hua Hospital, tan-awa ninyo kining punto nga akong gireklamo.

* * *

Atensyon mga sakop sa CITOM nga gitugyanan pagpatuman og road-side smoke emission testing. Dunay sakyanan nga tig-deliver og mga LPG grabeha g’yud nga asoha. 

Nakalimot ko sa numero sa plate numbers, basta kay GKL ang unang litra ug blue ang color sa sakyanan. Nagdali-dali man gud ko kay mora’g nagdaub.

Dili na maayong padaganon sa karsada ang maong sakyanan.

Gawas nga nag-aginod nga hinay ang dagan didto sa Ramos Street adtong Huwebes sa hapon, ang itum kaayo nga aso migawas didto ilawom sa makina ug duna say didto sa tambutso.

Grabeha lagi. Nakaingon ko nga wala uro’y mauwaw ang tag-iya sa maong sakyanan nga nagpatuga-tuga og negosyo nga dili makaatiman pagmentinar sa iyang kahimanan.

Maayo tingali nga apilon kini pagpahimo’g ordinansa sa dakbayan nga ang mga sakyanan nga ingon niini, magbuga og itom na g’yud kaayo nga aso, dili na padaganon ug dakpon ang mga drayber.