EDITORYAL- Pagka-boksidor ug pagka-politiko

Gidayeg sa kadaghanan ang paninguha ni Sarangani Rep. Manny Pacquiao nga mohimo og kalahian ngadto sa iyang giserbisyohan nga probinsiya ug ngadto sa Pilipinas.

Bisan sa iyang kalambigitan sa natad sa pamoksing, gipaninguha ni Pacquiao nga maka-apas sa halapad nga tahas alang sa usa ka kongresista, hinungdan nga paspas ang iyang pagtuon sa mga pamaagi sa Ubos Balay Balaoranan.

Gani, si House Speaker Feleciano “Sonny” Belmonte Jr. nakadayeg sa performance sa people’s champ, ilabi na ang iyang unang speech sa hawanan sa Kamara.

Apan sama sa pangagpas sa kadaghanan, ang iyang paninguha nga moserbisyo sa katawhan sa iyang probinsiya mabalda gayod sa iyang pagkinabuhi isip atleta. Mao usab ang iyang pagka-atleta nagsugod na kabalda sa iyang pagkanunayan sa Batasang Pambansa.

Taliwala niining iyang pagsagol sa duha ka kinabuhi -– ang pagka-atleta ug pagka-politiko, nagsugod siya og desider og mga butang nga mahimong makapabati sa panagway sa Ubos Balay Balaoranan o kaniya nga usa ka boksidor.

Sama pananglit sa laraw ni Pacquiao nga adto mohimo sa iyang training sugod karong bulana sulod sa Batasang Complex sa mga tungatunga sa sesyon sa Kamara, sumala pa ni Speaker Belmonte nga dili siya gustong mahimong focus ang Ubos Balay Balaoranan sa mga propesyonal nga away.

Gihulagway ni Belmonte nga unfair alang kang Pacquiao kun anha lang siya sa Batasan Complex mag-training tungod kay usa ka dakong away ang iyang atubangon tali ni Antonio Margarito, tungod kay ang mga tawo manganha lang hinuon aron mosaksi sa iyang buhaton.

Samtang suportado sa mga Pilipino ang sunod niyang away tali ni Margarito karong Nobiyembre 13, apan mabiyaan gayod sa makadiyot ang iyang mga konstituwente ilabi na unya sugod sa iyang training hangtod sa adlaw sa iyang boksing.

Mao kini ang resulta sa paggakus og duha ka malisod nga kinabuhi – ang pagka-boksidor ug pagka-politiko.