Sa barangay San Nicolas-Proper

Karon nga bag-o na ang pamunoan sa nasud, angayang ipatuman ang kabag-ohan sa pagpamuno gikan sa nasyonal nga mga buhatan hangtod na ngadto sa labing mubo nga buhatan sa gobyerno – ang mga barangay.

Usahay dayag kaayo sa mata sa publiko ang pagpabadlong ug mga binuang sa mga opisyal, apan wala lang matagad sa hingtungdang mga ahensiya tungod kay ingon usab ang kahiwi ang labing taas nga opisyal kaniadto nga mao ang presidente.

Apan karon nga tinguha sa administrasyon ni Pres. Benigno Simeon Aquino III nga malimpyohan ang gobyerno, kinahanglang apilon sa pagpitol ang mga barangay kang kansang mga opisyal nakalimot na sa mandato nga gitugyan sa katawhan nganha kanila ug nagpatuyang na lang sa kaugalingon.

Sama sa among barangay sa San Nicolas-Proper, siyudad sa Sugbo, sukad nahimong kapitan sa barangay si Edgar Lauron, wala na gyud kini maayong direksiyon.

Una, ang barangay hall naingon na og iyang estambayanan ug gihimong puy-anan sa iyang paboritong barangay tanod nga gihinganlan og Nick Yap.

Ibutang nato og gihimong administrador si Nick sa barangay hall, apan kinahanglan ba gyud kini niyang puy-an?

Kang kinsa man nga kuryente ang gigamit kun mag-eletric fan si Nick ug iyang pamilya gikan sa buntag hangtod sa sunod buntag? Si Nick ba ang nagbayad sa kuryente sa barangay hall o si Kapitan Lauron?

Pananglit maligo ang si Nick, asa man siya kuha og tubig?

Dili nalang nato tawgon ang atensiyon ni Kapitan Lauron tungod kay asa akong nahibaw-an siya man ang nagpapuyo ni Nick ug sa iyang pamilya dinha nianang barangay hall.

Ang maayo niini, ang Department of Interior and Local Government mismo ang motawag sa atensiyon ni Kapitan Lauron. Kun dili motuman, aw, duna may Ombudsman.

Lain nakong na-obserbahan mao kanang atubangan sa San Nicolas-Proper Barangay Hall gihimo nang “open dumping site” kay ang mga basura anha lang gipanglabay sa gubaon nga dumptruck sa barangay.

Ang mangagi paingon sa Tabo-an Public Market makapangusmo sa kabaho tungod sa nagkadaiyang hugaw’ng basura nga anaa gi-dump sa gubaon nga dumtruck.

Dili ko motuo nga wala makahibalo si Kapitan Lauron niining problemaha, apan sa akong nahibaw-an igo lang kuno kini siyang manabon sa iyang ilong kun mosulod sa barangay hall.

Kapait og ingon niini ang kapitan sa tanang barangay sa Sugbo, alegre man tuod ang barangay hall kay dunay nagpuyo nga pamilya sa barangay tanod, apan hilabihan usab nga kabaho.

Taym pa, nganong hangtod karon wala pa man na maayo nang dumptruck sa barangay San Nicolas-Proper?

Dili ba gigastohan naman na og P95 mil? Asa man mipaingon na ang P95 mil, sa bulsa o sa makina?

Pero kun akoy pabut-on, pasagdan na lang kini si Kapitan Lauron. Ang maayong buhaton sa mga San Nicolasnon patilawon kini siya karong Oktubre.

Sa akong tan-aw, walay “actual management” si Kapitan Lauron, mura og iya lang kining gitayo-tayo ang pagdala sa barangay.

Dili kamao!