Dakung hagit sa katakus

            Nalipay ko pagkadungog sa pasalig sa bag-ong hepe sa Squatters Prevention Encroachment Elimination Division (Speed) nga pangayoan niya’g legal opinion sa mga abogado sa dakbayan kabahin sa abuso sa pipila ka tag-iya og mga tindahan.

            Ang gipasabot ni Artes mao kadtong reklamo sa pipila ka vendors nga pangayoan usab sila og abang sa mga tag-iya og establishments bugti sa pagtugot kanila nga makapaninda diha sa aseras. Nakasabot ko nga gusto lang g’yud si Artes nga mangayo og klaro nga katin-awan apan sa among panag-estorya iya g’yud nga gitataw nga ang mga tax collectors ra sa dakbayan ang gitugotan nga mangolekta og arkabala gikan sa mga sidewalk vendors.

            Aw hinoon kun ang barangay dunay ordinansa nga nagtugot kanila nga makakolekta usab sila og arkabala, maisip gihapon nga legal. Ngano god tawon nga mangayo man og bayad o abang ang mga tag-iya og establishment? Tinuod, sila maoy migasto sa pagpatukod sa aseras atubangan sa ilang mga balay-patigayon, apan katungdanan kana nila ubos sa balaud.

            Gilatid sa balaud nga ang aseras atubangan sa ilang balay-patigayon gamiton ra alang sa publiko. Hinoon, panahon sa pasko ug ubang special nga okasyon, mahimong hatagan lang sila og “humanitarian consideration.”

            Ang dakbayan dunay ordinansa nga nagdili pagpamaligya og bisan unsa diha sa aseras. Kun dili kamo gusto nga patindahan ang atubangan sa inyong balay-patigayon, ayaw patindahi, dili kay mangayo kamo og bayad.

            Abuso na man kanang inyo. Maisip na kini nga giyatakan ninyo pag-ayo ang mga kabus. Kun dili ninyo tugotan nga makapamaligya ang mga vendors atubangan sa inyong establishment, wala’y problema.

            Sama gud sa gihimo sa usa ka dakung tindahan sa eskena Colon ug Leon Kilat, hawan kaayo ang aseras atubangan ug kilid sa ilang establishment kay wala man sila motugot nga may vendors nga maninda.

            Ang tinuod, ang mga tawo nga anaa manginabuhi sa aseras, dili angay’ng kulban og kaldero nga wala nay ikapakaon sa ilang pamilya. Apan angay lang sila nga kontrolahon.

            Ang laraw ni Mayor Michael Rama nga usa lang ka bahin sa aseras sa matag karsada ang pabaligyaan uyon kaayo ko og usa kini ka nindot kaayo nga lakang.

            Mao kini ang gitawag og “win-win solution” sa mga tindera ug sa mga tawo nga anaa kanunay mag-again sa aseras.

            Kadtong mga tawo nga magdali dili na mahasol kay ang aseras nga ilang lakwan wala na may mga tindera. Kun mapatuman na ang plano ni Mayor Rama, ang mga vendors adto ra sa usa ka bahin sa aseras maninda.

            Gisugyot ni Artes nga ang aseras nga buyon sa Gaisano Main (atbang sa University of the Visayas) ngadto na sa eskena Leon Kilat maoy dili na patindahan sa mga vendors.

            Kanindot g’yud kun kini mapatuman na sa hingpit. Dinhing bahina nga mosaludo ko pag-ayo ni Rama. Mao kini ang katumanan sa iyang gipasalig nga ubos sa iyang administrasyon “Ang gubot iyang hapsayon, ang bati iyang nindoton.”

            Nakabantay ba kamo nako, kini si Mayor Rama suod ko kaayo nga higala, usahay lang dili kini motubag sa akong mga tawag ug text messages kay busy tingali kaayo.

            Apan kun matan-aw nako nga bati ang iyang mga programa dili g’yud mosipyat nga ako siyang sawayon, apan daygon usab kun dunay maayo nga programa.

            Ug kabuotan hinoon, lupig ra si Rama ni city administrator Jose Mari Poblete, ang labing maayong pagkapili nga department head sa mayor.