Grabeha g'yud uy!

Nakapanglingo-lingo g’yud ang mga opisyal sa Commission on Audit dihang akong gikuhaan og reaksyon sa pag-apil sa mga sakop sa Mactan Airport Board nga makadawat og makabuhong nga Collective Negotiation Agreement (CNA) bonus.

Tiaw mo ba’y samtang tag P30,000 ang honoraryom kon per diem sa mga sakop sa Mactan Airport Board, gipakapinan pa sila og laing tag P90,000. Sa ato pa, P120,000 g’yud ang ilang kobrahunon apan gikuhaan man og mora’g buhis, P118,200 ra’y ilang nadawat matag usa.

Matud ni senior state auditor Anecita Pilapil nga ang mga sakop sa Mactan Airport Board dili na g’yud unta angay’ng hatagan pa og CNA bonus.

Apan kinsa may magbuot nila nga sila ra man usab ang mohukom. Mora ba og masabot nato ang mga sakop ra sa Mactan Airport Board ang mohukom kun pila’y ilang dawaton.

Samtang wala pa hinoon ko’y nahuptan nga dukomento, apan usa ka tinubdan nako diha sa Mactan Airport nasagmuyo kay ubay-ubay’ng kawani sa airport nga miretiro sa katungdanan human sa daghang tuig sa pagserbisyo, nakadawat lang og gamay’ng pabawon.

Apan kun ang mga sakop gani sa Mactan Airport Board maoy mo-resign, ang ihatag katumbas g’yud sa tag-usa ka buwan nila nga honoraryom.

Ang dukomento nga akong nahuptan nagbutyag nga ang gihatagan og tag P118,200 nga CNA bonus sa miaging buwan mao sila si DOTC Secretary Leandro Mendoza, Gobernador Gwen Garcia, Undersecretary Jose Vicente Salazar, Director General Ruben Ciron, Director Ma. Lourdes Dedal, private sector representatives Valeriano “Bobit” Avila, Gordon Allan Joseph, Renato Osmeña ug Winglip Chang.

Apil nga gihatagan mao si kanhi tourism regional director Patria Aurora Roa.

Sa ato pa, gawas sa tunga sa milyon ka pesos nga gihatag kaniya sa Mactan Airport kaniadtong miaging semana nakadawat diay usab si Roa og P118,200 nga bonus.

Si airport manager Danilo Augusto Francia gihatagan usab og bonus, mas daku ang iya kay P144,736.44. Ang rason niini kay ang sweldo ni Francia pagka manager P39,026 man ang matag buwan.

Aw si Francia angay tingali nga modawat og bonus kay kawani man siya sa airport. Ang kwestyon diha kay pwerteng dakua nga kantidad.

Ang COA daan na nga miingon nga kay gawas ni Francia ang ubang sakop sa airport Board dili man kawani sa MCIAA, dili sila angay nga modawat o hatagan og bonus.

Gipasalig ni Assistant Ombudsman Virginia Palanca-Santiago nga himoon nila ang tukmang lakang basi sa dukomento nga ilang mahipos, apan wala siya mobutyag kun unsa kini.

* * *

Nindot ang lakang nga pagpatuman sa “one side vending” kay kini magkahulogan nga makapaspas kini sa paglakaw sa mga pedestrians ug dili na anha sa karsada moagi ang mga tawo. Plano ni SPEED chief Noel Artes nga ang kilid sa dalan Colon buyon sa Gaisano Main paingon na sa eskena Leon Kilat, dili na pabaligyaan og mga sidewalk vendors.

Adto ra sila sa pikas nga bahin sa karsada maninda. Unya, did-an usab ang mga sidewalk vendors nga ibilin ra nila sa aseras ang ilang mga karomata.

Dili na usab itugot ang pagkoral-koral og mga pisi sa mga aseras panahon sa gabii. Tinuod, daku kining binuang nga koralon sa mga gwardya ang aseras panahon sa gabii.

Kun ila kining himoon, ang mga tawo adto na lang hinoon moagi sa karsada, ug masakripisyo sila kun mag-uwan.