EDITORYAL - Binuang maoy angay susihon

Ang mando ni Mactan Cebu International Airport Authority general manager Danilo Francia pagpa-imbestigar aron “huboan sa maskara” ang empleyado sa tugpahanan nga mitug-an ngadto sa media kalabot sa P500 mil nga severance pay alang kang kanhi Department of Tourism regional director Patria Aurora Roa usa ka matang sa pagpamiit sa tawong nagpakabana.

Si Ombudsman-Visayas Director Virginia Palanca-Santiago mihulagway sa kamandoan ni Francia nga usa ka matang sa “harassment” ngadto sa informer nga mitug-an sa P500 mil nga severance pay ni Roa ngadto sa mga sakop sa media.

Dautang ehemplo ngadto sa mga empleyado sa gobyerno ug mga korporasyon nga gipanag-iya sa kagamhanan sa nasud ang kamandoan ni Francia.

Imbes suportahan ang mga kawani nga mobarog batok sa mga hiwi nga aksiyon ug kalihukan sa ilang mga labaw, ang pagpa-imbestigar kanila maghatag kanila og kahadlok nga panimaslan sa ilang mga labaw sama ni Francia.

Gawas pa, dili na kininahanglan nga mailhan ni Francia ug sa mga sakop sa hunta direktiba sa MCIAA ang empleyado nga nakapublikar sa P500 mil nga benepisyo sa miretirong kauban nila. Kini, tungod ka yang Ombudsman-Visayas nagsugod na sa imbestigasyon niini.

Ang angayang imbestigahon niini mao mismo ang anomalosong paghatag og severance pay ngadto kang Roa nga ingon kadako, dili ang paghungaw niini ngadto sa media.

Maayong mahibaw-an ni Francia ug sa mga kaubang miyembro sa hunta direktiba sa tugpahanan nga ang dakong binuang nga kinahanglang korehian mao ang paghatag og P500 mil nga severance pay kang Roa, ug dili ang paghungaw niini sa media.