EDITORYAL - Kaugmaon sa kabataan ang gi-alkanse

Si Bise Mayor Joy Augustus Young nagtuo nga ang Department of Education mi-overpriced og 30 porsiyento sa pagpabarog og mga school buildings nga gipangtukod niini.

Labing minus unom niining maong proyektoha ang nakit-an ni Young nga ania dinhi sa Sugbo. Gikahibulong kini ni Young tungod kay kada building adunay upat ka lawak-saringan ug kada lawak mokantidad og P1 milyon, nga matud niya, kun ang kagamhanan sa siyudad ang mopabarog mokantidad lamang kini og P700 mil.

Si DepEd regional director Recaredo Borgonia mipasabot nga ang formula maoy gisunod sa tanang school building nga gipabarog sa DepEd lukop nasud.

Angayang susihon kining nakit-an nga lungag sa pagpabarog og mga tunghaan pinaagi sa DepEd, mantras aduna pay higayon sa pag-usab sa pamaagi nga tataw’ng nasagolan og korupsiyon diha nianang ahensiyaha.

Ang P300 mil nga deperensiya sa presyo matag lawak saringan dako na kaayo nga salapi aron ikapabarog og daghan pang tunghaan ug lawak saringan, ug ipaayo sa mga nangaguba.

Hilabihang kadaghan sa mga tunghaan karon ang nag-antos sa kakulang sa lawak saringan. Dungan niini, nangreklamo usab ang mga magtutudlo sa mga bag-ong natukod nga lawak saringan nga wala na mahasubay sa standard.

Lisod maka-eskapo ang DepEd sa mata sa publiko nga nagbantay sa mga ahensiya sa kagamhanan nga gihugpaan og mga kurakot. Sa mga proyekto, kining inprastraktura maoy labing dako nga tinubdan sa korupsiyon.

Apan kun magpadayon ang DepEd sa pagdaginot sa mga lawak-saringan aron ikapaburot sa bulsa sa pipila ka opisyal niini, ang kaugmaon sa kabataan ang gi-alkanse.