EDITORYAL

Magsugod na sa paglihok ang Truth Commission nga gihulma ni Pres. Benigno Simeon Aquino III aron mosusi sa kamatuoran, mangita og ebidensiya ug motaral sa hukmanan sa mga hiwi ug kurakot nga mga opisyal sa miaging administrasyon.

Kun itugot sa mga ebidensiya, i-apil sa pag-imbestigar ug kasohan si kanhi presidente ug karon Rep. Gloria Macapagal-Arroyo.

Unang kaso nga gitutokan sa komisyon nga gipangulohan sa Sugboanong si kanhi Supreme Court Chief Justice Hilario Davide Jr. mao ang P728 milyones nga fertilizer scam.

Hinaot unta nga ipakita gyud sa maong komisyon ang kaisog paggukod sa mga kurakot sa miaging administrasyon, nga bisan ang labing taas nga opisyal kaniadto nga si Arroyo angay patubagon sa kaso.

Maayong rombohon karon sa Truth Commission ang mga dugang testigos ug mga ebidensiya aron mapasaka gyud ang kasong plunder sa mga nalambigit sa fertilizer scam. Gawas kang Arroyo, gilambigit usab niini silang kanhi Agriculture Secretary Luis “Chito” Lorenzo ug ang kontrobersiyal niyang undersecretary nga si Jocelyn “Joc-Joc” Bolante.

Laing panghinaot sa publiko nga dili masambogan og politika ang pag-imbestigar sa hiwing mga opisyal ug pagpatubag kanila sa ilang mga nahimong salaod.

Sa mga testigos usab, maayong mokooperar na lang sila sa administrasyong Aquino aron mapalutaw ang kamatuoran. Kun dili tinuod – base sa mga ebidensiya – ang Truth Commission molimpyo usab sa ilang mga ngalan.

Kun adunay mga ebidensiya, ang mga akusado angayang manubag sa ilang mga salaod. Mao kini ang bayad sa ilang pagpakasala samtang diha pa sila sa gahum ug katungdanan.

Ang maong komisyon magsilbe usab nga leksiyon alang sa mga kasamtangan ug umaabot pa nga mga opisyal nga magmatngon na sila sa ilang pangatungdanan; nga kun masakpan sila sa ilang pagpangawkaw, luyo sa bugnaw’ng rehas sa prisohan ang ilang sangpotan.