Kausaban, makab-ot kaha?

Kagahapon sa udtong tutok pormal nga gisugdan ni pangulong Noynoy Aquino III ang iyang trabaho isip ika-15 nga Pangulo sa Pilipinas. Atubangan sa liboan nga katawhan nga nagtapok sa Quirino Grandstand ug milyong misaksi niya sa tibook nasud ug kalibotan, iyang gipalanog ang saad sa kausaban. Iya kaha kining makab-ot o magpabilin lamang gihapon kining damgo. Hinoon wa may dautan kun magdamgo ka og kaayohan ilabi na kun kini para sa katawhan.

Kausaban, pulong nga sayon litukon apan butang nga lisod makuptan. Ambot kaha kun mopaduol na ba kini kanato nga si Noynoy na ang nagdala sa renda sa kagamhanan.

Ang kausaban dugay nang gidamgo sa mga nahimong pangulo sa nasud apan idlas gayod kini gumikan ba kaha kay ang mismong nagsulong niini wa upod mag-usab. Hinoon ang damgong kausaban dili gayod mahimo kun wala kamo, kun wala ka ug kun wala kita.

Si Noynoy dili si Superman busa iyang gikinahanglan ang suporta sa katawhan aron iyang makab-ot ang gidamgong kausaban. Maong sa pagsugod pa lang niya sa iyang mensahe iya dayong gipaabot ngadto sa katawhan nga nagbutang kaniya sa katungdanan nga sila ang iyang kusog ug sila ang iyang pader.

Ang kahiusahan mao ang yawe sa kausaban nga dugay na natong gibugtaw busa ato kining ihatag ngadto kang pangulong Noynoy kun ugaling gusto man natong mabuksan ang ganghaan sa kausaban. Kun ang kahiusahan mao ang yawe sa kausaban, kita mao usab ang tiil nga magdala sa yawe sa kausaban ngadto sa iyang katumanan.  

Kun mapakyas man si Pangulong Noynoy Aquino sa pagkab-ot sa iyang gidamgong kausaban tungod kay ato lang siyang gipasagdan puwes ayaw siya basula hinunoa basula ang imong kaugalingon kay wa ka motampo para sa kalamposan niini.