Goryo-Goryo ni Soc

Kun wa kahibawo si Talisay City Mayor Socrates Fernandez nga ubos sa kustodiya sa kapolisan ang sakyanan sa iyang anak nga si Joavan, kun wa siya kakita sa police line palibot sa sakyanan, ug kun wa siya badlonga sa nagbantay nga kapolisan, nganong wa man niya kabay-i ug gipauli ang tibuok sakyanan, inay pagpanaginot lang og kuha sa gamay nga puwa nga bag sa babaye?

Kun way gitagoan, nganong wa man niya ipakita sa kapolisan, sa konsehal ug duha ka barangay tanod sa Lawaan 3 ug sa naglibot nga mga molupyo ang sud sa bag nga iyang gikuha ug ang uban pang butang sa sakyanan sa way pagpaabot sa search warrant?

* * *

Kun di iya ni Joavan ang pistola nga nakuha sa kapolisan gikan sa sakyanan, kinsa may nagbutang ug kanus-a man gibutang? Di ba (1) gikandadohan man ang sakyanan dihang niawhag ang nipasangil nga gitionan ni Joavan nga siksikon ni sa kapolisan ug (2) diha na man mogawas ang yawe (dala sa sinugo ug representante ni Mayor Fernandez nga si Nito Fernandez) dihang nihulga nang kapolisan pagbuak sa bildo sa sakyanan? Kun mga polis ang nagbutang sa pistola, giunsa man nila paglipat silang Konsehal Frederick Marababol ug ang duha ka tanod?

Kun manghunaw si Joavan og kalambigitan sa mga butang sud sa iyang sakyanan, nganong nakapaneguro man nga gibutang-butangan siya og pistola?

* * *

Kun nagtuo silang Mayor Fernandez ug Joavan nga giinitan ug giapiki lang sila sa kapolisan, (1) nganong wa man dayon molihok ang mga polis dihang nagpalaban nila si Vincent Castrodes nga gitionan siyang Joavan, (2) nganong wa man babagi sa mga polis si Mayor Fernandez sa iyang paglapas sa police line ug (3) nganong wa man nila posasi ang mayor dihang giablihan ang pultahan sa sakyanan ug gikuha ang bag?

Kun nagduda si Mayor Fernandez nga lain na sab ning butang-butang sa iyang politikanhong mga kaatbang, haskang lisorang tuohan nga si Castrodes sinugo ni Mayor Tomas Osmeña o ni Raul Bacaltos.

* * *

May sukaranan ang pagtandi sa pagdumili ni PRO 7 Chief of Staff Edgardo Ingking pagkuha og search warrant pag-abli sa sakyanan ni Congressman-elect Benhur Salimbangon bisan sa pasangil ni Bogo City Mayor Junnie Martinez nga may gitagoang daghang armas sa niaging piniliay ug sa kaagresibo ni CPPO Chief Erson Digal pagkuha og search warrant ug pag-abli sa sakyanan ni Joavan tungod sa pasangil ni Castrodes.

Ning higayona, di na mabasol si Mayor Fernandez kun makumbinser nga labihang lubaya ni Ingking pagsusi may mga armas ba gyod sud sa gidudahang sakyanan sa Bogo kay sikit sa luwag sa Kapitolyo si Salimbangon samtang nangisog si Digal batok niya kay nahiagom og makauuwaw nga kapildehan si Gobernador Gwen Garcia sa Talisay.

* * *

Email:l[email protected]