Daghan ang nakugang, natingala, nasubo, nalipay sa wa’ damhang pagkadaog ni Makati City Mayor Jejomar Binay. Daghan ang natingala nga gikan sa ubos nga rating pipila ka buwan sa wa’ pa ang piniliay, kalit lang nga nisaka ang approval rating ni Binay hangtud nga nitupong na kang Senador Mar Roxas, nga maoy nag-una sa ratings su’d sa pipila ka buwan. Daghan ang nangutana, gi-unsa sa usa ka mayor pagsakmit sa ikaduha sa labing taas nga posisyon sa nasud. Daghan ang natingala giunsa ni Binay sa paglampos sa kampanya gikan sa lokal nga posisyon hangtud sa usa sa labing impluwensya nga pwesto. Nia ang pipila ka lakang nga gihimo ni Binay isip pagpangandam pagkab-ot sa gidag-an niyang katungdanan.
• Ang Makati City ang labing adunahan nga dakbayan sa nasud. Ang iyang tinuig nga budget nga mokabat og kapin sa dos bilyones pesos ang usa sa labing dako sa tanan nga mga lokal nga kagamhanan sa nasud. Inay nga gamiton lang ni Binay ang maong salapi sa syudad, gigamit ning Binay sa mas lapad pang pagserbisyo sa uban nga mga dapit sa nasud. Karon nigawas, nga ang ambisyon ni Binay nga langkaton ang usa sa labing taas nga pwesto, dugay nang gipangandaman ni Binay.
• Base sa taho, mikabat sa kapin 200 ka mga lokal nga kagamhanan sa nasud ang nahimong igsuon nga dakbayan ug lungsod sa Makati. Lahi sa uban nga sisterhood agreement, gitabangan sa Makati ang mga lugar nga giisip nilang igsuon. Paspas nga makapada’ og tabang sa Makati panahon sa kalamidad sa maong mga lugar nga nagkalisud. Ang maong pagtabang sa Makati nga tataw sa mata sa mga residente, nigamot na sa huna-huna sa mga residente nga nakadawat sa hinabang sa Makati. Kung nakahinumdum ka dinhi sa Sugbo, adunay mga multicab kaniadto nga gikan sa Makati. Sa lalawigan sa Bohol, may mga dapit ‘sab nga gisagop ug gitabangan sa Makati.
• Ang pakig-alayon ni Binay sa gatosan ka mga mayor kansang lungsod natabangan, napahimuslan ra gyud sa miaging piniliay. Di’ mahimong talikdan sa maong mga LGU ang usa ka mayor sa Makati nga direktang nakatabang kanila panahon sa ilang kalisud ug panginahanglan. Ang piniliay ug ang pagboto sa mayor sa Makati maoy nahimong bawos sa ilang nadawat nga tabang.
• Giangkon ni Binay sa media nga dako’g tabang sa iyang kalampusan ang mga kauban niya sa fraternity nga APO. Dinhi sa Sugbo, may mga kaila ko nga sakop sa maong grupo nga maoy nihatag sa ilang oras ug nitunol sa ilang tabang pinansyal sa pagpadagan sa kampanya ni Binay. May minilyon ka sakop ang maong fraternity sa nasud nga mga professionals ug anaa sa maayong kahimtang sa pagpuyo. Nakadugang ‘sab sa boto ni Binay ang pamilya ug mga higala sa APO nga nisuporta kanila.
• Gawas sa APO, giingong nipaluyo ‘sab ni Binay ang mga miyembro Boy Scout of the Philippines nga gibana-bana nga may tres milyones ka sakop sa nasud. Gilangkuban sa BSP sa mga hamtong nang miyembro nga may impluwensya sa ilang komunidad nga kung mao nay modani sa mga botante, siguradong sundon ug tuhoan. Ang pakiglambigit ni Binay sa daghan ug dagko nga organisasyon maoy nahimo niyang alas aron labnihon gikan sa mga dagkong panga’n sa politika ang ika duhang labing taas nga pwesto.
• Karon, momarka na sa kasaysayan sa nasud si Binay isip labing una nga opisyal gikan sa lokal nga kagamhanan nga nikab-ot sa taas nga pwesto. Ang sistema nga gihimo ni Binay nga naglakip sa iyang pakigtambayayong kang kanhi presidente Joseph Estrada nga humot pa gihapon sa masa, maisip nga epektibong mga lakang paingon sa kalampusan. Nagpasabot lang ni sa politika sa nasud, daghan ang posibleng mahimo o mahitabo basta may tukmang diskarte lang.
* * *
Email: rico_lucena@abs-cbn.com or ricolucena@yahoo.com