EDITORYAL - Sibog sa unahan

Karon nga human na ang canvassing sa pagka-presidente ug bise presidente sa nasud, angayang mosibog na kita sa unahan aron makaginhawa ang nagkalisod natong inahang Pilipinas.

Karong adlawa, alas 2 sa hapon, iproklamar na sa mga magbabalaod nga naglangkob sa National Board of Canvassers ang bag-ong presidente sa nasud nga si Sen. Benigno Simeon “Noynoy” Aquino III ug bag-ong bise presidente nga si Makati Mayor Jejomar “Jojo” Binay.

Si Aquino nakakuha og 15,072,053 botos nga gisundan ni kanhi Pres. Joseph Estrada sa botos nga 9,471,029. Nagsunod si Sen. Manny Villar, 5,484,747; Gilberto Teodoro Jr., 4,065,524; Eduardo Villanueva, 1,122,896; Richard Gordon, 498,414; Vetallano Acosta, 180,839; Jesus Nicanor Perlas, 54,256; ug Sen. Ma. Ana Consuelo Madrigal, 46,041 botos.

Si Binay nakakuha og 14,501,371 botos ikomparar sa kang Sen. Manuel “Mar” Roxas III nga 13,889,416. Nagsunod si Sen. Loren Legarda, 4,212,152; Bayani Fernando, 1,014,846; Eduardo Manzano, 803,738; Perfecto Yasay, 363,912; Jose Sonza, 63,914; ug Dominador Chipeco, 52,275 botos.

Ang kampo ni Roxas naghunahuna pagpasaka og electoral protest ngadto sa Korte Suprema, ang Presidential ug Vice Presidential Electoral Tribunal.

Apan ang kaso nga isang-at ni Roxas dili angay hunahunaong babag aron mosibog na ang nasud ngadto sa unahan, sumala sa gidamgo nga “reforms” ni Aquino sulod sa mosunod nga duha ka tuig sa unom ka tuig niyang termino isip pamuno nasud.

Isip pahinumdom, si Aquino maoy gibotohan sa katawhang Pilipino tungod sa iyang campaign slogan nga “Kung walang corrupt, walang mahirap!” Busa, niining paagiha angayan sugdan sa pamunoan unya ni Aquino nga magsugod inig panumpa niya sa udto sa Hunyo 30, ang pagpuhal sa mga tawo sa kagamhanang nasyonal, ilabi na kadtong mga kawatan, kurakot ug tikasan.

 Apan labaw sa tanan, ang labing dakong hagit sa Aquino administration mao ang kalisod nga wala kahatagi og kasulbaran sa nangaging mga presidente sa nasud.