Mahimo bang i-publish ang sweldo ug allowances sa mga public officials?

Sa ato nang nahisgutan, kinahanglan tinud-on ni Noynoy ang iyang krusada nga “kung walang corrupt walang mahirap!” Lisud kining tumanon, apan, mituo ang lungsod kaniya, ug labaw pang mituo sa iyang pag-ingon nga “hindi ako magnanakaw.”

Gumikan sa haylo sa usa ka bitin, nga sila mahisama sa Ginoo, gisupak nila ni Adan ug Eva ang sugo sa Ginoo; gumikan sa kasilag, gipatay ni Cain si Abel iyang igsoon; for twenty pieces of silver, gibaligya ni Judas ang iyang agalon nga Manunubos, ug sa eleksyon nga gihimo diin ang katawhan gipapili kanila ni Jesus ug Barabas, majority, ug overwhelming ang boto sa katawhan pabor ni Barabas. 

Kini ug daghan pa, atong mabasa sa Bibliya ang nagkalainlaing matang sa korupsyon nga nanghitabo gikan pa sa panahon nila ni Adan ug Eva, hangtud karon. Gipalagpot nato si Marcos, apan nagpabilin ug mi-grabe na hinoon ang korupsyon.

Gisugyot nga tungod kay usa sa labing daku nga tinubdan sa korupsyon, mao man ang pork barrel kinahanglan i-abolish kini. Mahimo kaha ni Noynoy? Kun ma-abolish man, duna pa kahay molansar pagka-Senador o pagka-Kongresista? Mag-inilogay pa kaha ang mga party-list? Tingalig ang AME party-list na lay mahibilin!

Pila ba goy sweldo sa usa ka Kongresista o usa ka Senador? Nganong mag-inilogay man ni sila? Ug nganong mas daghan man ang gustong mag-secretary sa public works, o Commissioner sa BIR, Customs, o sa Comelec? Pila bay sweldo ug mga allowances ini nila?

Kini sila, mga public property man, isip mga alagad ug sulogoon sa lungsod, di ba mahimo nga mahibawo ta sa iksakto nilang mga sweldo ug allowances ? Nganong mag-inilogay man ni sila diha ?

Ug ngano man sad nga wa gyud ta nila matultoli, aron maka-share usab unta kita sa kaharuhay sa ilang kinabuhi ? Nganong sila-sila ra man ?

Bitaw, kitang tanan, naghinaut nga mawagtang na gayud ang kagaw sa korupsyon sa atong nasud. Usa kini sa naka-ut-ot sa atong kahimtang. Ang atong national budget sa miaging tuig mikabat og 1.4 trilyones ka pesos. Kadaghan ining kwartaha! Diin man ni paingon?

Karon, kapin sa 1.6 trilyones ka pesos ang atong nasudnong budget. Ambut asa na usab kini paingon. Apan, kun molampus si Noynoy sa iyang ”Walang corrupt-walang mahirap” slogan, daku kaayo ang purohan nga magmauswagon na gyud ang atong nasud, ug mabuntog da nato ang tumang kawad-on nga mikuyananp sa tibuok nasud.

Yuna pa, wa mo kamatikod nga samtang nagpunay kitag hisgut og korupsyon, pila ka bilyon ka pesos ang nahanaw gumikan niini, apan wa gyuy bisag usa ka dakung mamsa ang nakit-ang sad-an tungod kay walay ebidensiya. Nganong wa may ebidensiya?

Hinaut nga, this time, makakita ra gyud og ebidensya si Noynoy.