EDITORYAL - Running oven nga taxi units

Pipila sa mga taxi driver ang nakatug-an nga medyo nabulahan sila og gamay niining panahona nga nag-antus ang mga tawo sa naglagitim nga kainit sa adlaw mugna sa El Niño phenomenon.

Tungod sa grabeng kainit, daghan sa mga pasahero mapugos pagsakay og taxi sa tuyo nga dili mababad sa kainit samtang magpaingon sa destinasyon niini. Kadtong dili maka-plete og P30 ang flagdown ug P2.50 kada patak, mag-PUJ na lang bisan mahikaligo na sa singot tungod sa kainit sa panahon.

Ning bulan sa Hunyo nga adlaw na usab sa ting-ulan, daghan gihapon ang mosakay og taxi, ilabi na kadtong dili gustong motimpasaw ug mabasa sa ulan ug kadtong nanagdali nga makaabot sa destinasyon.

Sa ato pa ang taxi nga miabot na karon og 6,000 ang gidaghanon sa Metro Cebu, pinangita karon sa mga pasahero.

Apan samtang nagkataas ang demand sa taxi, nagkaklaro usab ang abuso sa mga taxi operator ug sa mga driver niini.

Daghan kaayong taxi units nga nagdagan karon nga dili na maayo sakyan tungod sa kabaho ug walay limpyolimpyo. Ang pasahero maglibog kinsay nanimaho – ang taxi o ang drayber ba.

Apan ang labing dakong problema nga angay hatagan og aksiyon sa mga hingtungdang ahensiya mao ang kadaghan sa mga taxi units nga nagdagan nga wala nay klarong andar sa air-condition.

Imbes tuyo sa pasahero nga maka-relax sa bugnaw nga taxi samtang nagbiyahe, manghikaligo gihapon sila sa singot tungod sa tuman nga kainit sulod sa taxi.

Himuon lang rason sa mga drayber ang kainit nga dili makasugakod ang air-con. Apan nganong aduna man gihapoy daghang taxi units nga bisan sa kadaan, bugnaw man gihapon og air-con?

Maayo tingaleng tan-awon kining maong reklamo sa Land Transportation Franchising and Regulatory Board (LTFRB-7). Hagit sa bag-ong regional director nga si Benjamin Go ang pagtan-aw unsaon paggukod sa mga taxi units nga sama og hornahan sa pan.

Ang Metro Cebu Taxi Operators Association (MCTOA), isip organisasyon sa mga taxi operators, angay usab mohimo og self-regulation aron sulbaron kining nahimong alkanse sa mga pasahero nga nagbayad og sakto nga flagdown rate sa air-conditioned taxi units, apan nagsakay sa usa ka RUNNING OVEN.