Kahiusahan diha sa lahugay

Mayo 30, 2010: Domingo sa Santisima Trinidad (Solemnidad)

Mga Pagbasa: Pan. 8;22-31/Rom. 5; 1-5/Jn. 16; 12-15

Dili madugay, bulan na sa Hunyo. Dinhi sa Sugbo kini mahinungdanon kay karong bulana adunay ordenasyon. Ug dugang pa ang ubang mga pari ang pagabalhinon. Bag-ong dagway sa kasinatian, bag-ong pagtulon-an ug bag-ong kulbahinam nga hagit alang niadtong hingtungdan. Tukmang pamalandongan ning Solemnidad sa Santisima Trinidad nga isipon ang lahugay ingon nga higayon sa paghiusa diha sa kasingkasing ug hunahuna nga gikinahanglang mahitabo kini agi’g pagsanong sa tawag sa Dios diha sa ministeryal nga buhat sa usa ka pari.

Kun pamalandongan lang sa usa ka pari ang kalambigitan sa Santisima Trinidad sa iyang kinabuhi, iyang masuta nga mabulokon kaayo ang misteryo sa Santisima Trinidad kini tungod kay ang Dios dili Dios sa halayo kondili Dios sa pakiglambigit.

Mao nga ang pagkapari usab usa ka pakiglambigit sa mga parokyano nga iyang isipong mga anak. Dili siya agalon o dili ba kaha kapitalista nga nagpaabot og ginansiya diha sa mga kolekta kondili siya ang magbalantay kanila madako o ma-diyotay man ang kolekta.

Labaw na nga ang misteryo sa Santisima Trinidad nagtudlo nga diha sa nagkadaiyang bayhon sa kasinatian ang kahiusahan makab-ot lamang pinaagi sa gugma.

Ang lahugay sa kaparian usa ka tukmang higayon sa paghatag sa gugmang tim-os ug pagpakita sa pagkamasinugtanon sa kabubut-on sa Dios diha sa mga maalamon, mahigugmaon ug inantigong mga hukom sa mga board of consultors.