Sakpan g'yod mo

Duna ko’y nadawat nga report nga dunay mga kawani diha sa nursery sa Department of Agriculture (DA) sa Mandaue City nga walay klarong trabaho apan sigi ang sweldo.

Karong pipila ka adlaw masakpan ra kamo sa inyong kabuang. Ingna ko nga bakakon kun dili ba kamo masakpan kun padayonon ninyo ang inyong mga binuang nga nakapa-alkanse lang sa gobyerno.

Ka wala ninyo’y uwaw no, sigi mo og dawat og sweldo unya dili kamo motrabaho? Swerte ko nga dunay tawo nga inyong kauban nga maoy mihatag og tip kanako sa inyong kabuang.

* * *

Kining matanga sa binuang dili kini imposible nga mahitabo ug hayan gihimo gani sa ubang opisyal nga ang ilang mga katabang sa balay gisweldohan sa kwarta gikan sa kagamhanan. Dili ba tinuod?

Lisud man god kini mahibaw-an gawas kun dunay mohatag og inpormasyon. May mi-text man god nako adtong miaging Biyernes kabahin sa binuang sa ubang kawani sa DA nursery diha sa Mandaue.

Dayon ang nag-text nako nagpaila. Kaila diay siya nako kaniadto pa mao nga misalig siya nga mohatag sa inpormasyon. Tambag nako nga mentras wala pa kamo masakpi hunong na lang.

* * *

Uy, unsa kining report nga akong nadawat nga kadtong mosakay sa bag-ong bus nga gihatag sa City Hall ngadto sa mga barangay sa bukid, pabayron man?

Usa ka lumulopyo sa barangay Tabunan maoy mitug-an nako niining maong inpormasyon kagahapon. Tag P25 ang kolekta nila nga “plete” kay pamawi kuno sa konsumo sa fuel.

Abi nako og namasahero sila unya minus ra ang ilang gikolekta. Samtang uyon ra usab ang mga taga bukid kay mahal man og mosakay sila’g “habal-habal” apan tan-aw nako dili gihapon maayo tungod niining mga rason.

Ang maong bus sa Tabunan gamiton sa mga opisyal sa barangay kun may adtoon sila sa City Hall unya nganong mangayo man kamo’g bayad? Ingon ba diay niana ang pagserbisyo ninyo sa inyong katagi-lumulopyo?

Dili ba ang City Hall man gihapon ang mohatag sa inyong konsumo nga krudo sa sakyanan?

Mahimo man nga mangolekta kamo og ginagmay nga bayad sa mga pasahero apan himoi kini og ordinansa sa barangay, dayon paaprobahi sa City Council. Porbeda baya mo uy. Wala bay nakatambag kaninyo nga illegal kini?

Nangolekta kamo og bayad sa mosakay unya walay resibo. Dili ba posible nga kadtong tigkolekta mao ray makabulsa sa kinolekta? Uy, madaut baya mo aning inyong gihimo. Basin og mapasakaan mo’g kaso ani ha.

Pila ba ka barangay ang naghimo niini?

* * *

Misamot ka-busy sa mga pilionon karong panahona. Kaniadtong miaging hapon, gisuroy ni retired Colonel Rico Palcuto ang mga media outlets sa dakbayan sa Sugbo aron magpa-interview sa iyang tinguha nga mag-bise mayor sa dakbayan.

Sa giingon na nako, gidayeg nako ang mga tawo nga bisan og independente apan maninguha g’yod alang sa ilang kandidatura.

Sama ra sa akong amigo nga si Greg Dealagdon nga tagsa na lang nako makit-an kay paspas usab nga nangampanya pagka mayor sa Aloguinsan. Kusug ra ba kuno si Greg didto sigun sa akong nahibaw-an, apan kayod g’yod taman sa ginhawa nga kampanya.

Apan pastilan kining ubang kandidato, bisan og campaign materials nga sako sa semento na lang nga may suwat sa ilang ngalan wala g’yod ko makakita. Naghugaw-hugaw lang sa balota ang ilang ngalan.