EDITORYAL - Habal-habal i-regulate

Maayong suportahan ang tinguha nilang Konsehal Arsenio Pacaña ug Kongresista Nerissa Soon-Ruiz nga kahimoan og polisiya ang sikat nga transportasyon sa kabukiran nga mao ang “habal-habal.”

Nagkadaghan ang mga motorsiklo sa kabukiran nga gigamit sa pagpamasahero. Apan ang kabalaka ni Pacaña mao ang paggamit sa motorsiklo sa krimen, samtang si Soon-Ruiz miduso sa pag-ilis sa ngalan niini gikan sa habal-habal ngadto sa “angkas-angkas.”

Alang sa Banat News, mas labing maayo nga kahimoan og balaod ang paggamit sa habal-habal isip transportasyon.

Kini tungod kay samtang nagkadaghan kini sa kabukiran, kasagaran sa mga nagmaneho niini mga minor de edad pa nga walay lisensiya gikan sa Land Transportation Office; adunay daghan nga mga adik-adik; daghan ang walay “seminar” sa pagpadagan sa karsada ilabi na sa national highway, ug ang uban gigamit sa pagpanulis.

Tinuod nga ang mga lumolupyo sa kabukiran ang nakabenepisyo sa habal-habal o angkas-angkas, apan sa mga disgrasya nga nanghitabo lisod pagpaningil sa drayber ug operator sa ilang tulobagon ngadto sa mga biktimang pasahero.

Kini tungod kay walay igong regulasyon alang niini.