Kinsay nagsugo ni Mayor Andal?

Dakong binuang sa dehadong kandidato pagka-presidente ang pagsugo kang kanhi Mayor Andal Ampatuan Jr. kang Liberal party standard bearer Noynoy Aquino.

Sa niadtong nakalabay’ng duha ka semana, adlaw kadtong Martes sa dihang si Ampatuan mi-anunsiyo sa usa ka organisadong press conference sulod sa maximum security compound sa Bicutan nga suportahan niya si Noynoy pagka-presidente sa nasud karong Mayo 10 nga eleksiyon.

Bisan naka-posas ang mga kamot, iya gyud kining gibakyaw makadaghan aron maklaro sa kamera sa mga TV network nga nag-cover sa maong presscon ang iyang baller band (wrist band) nga kolor yellow, ang kolor ni Noynoy. Wala tingale makakaplag og campaign T-shirt sa Liberal mao nga plain yellow T-shirt lang iyang gisul-ob.

Pero ang nahibaw-an sa tibuok Pilipinas nga wala pay semana sukad niadtong adlawa nga iyang gi-endorso ang kandidatura ni Noynoy, nakita sa telebisyon nga nanghambog sa iyang baller band nga kolor orange nga adunay nakasulat nga ngalan ni Manny Villar, ang standard bearer sa Nacionalista party.

Kay mihimakak man si Villar nga wala siyay kalibutan diin og baller band nga orange si Ampatuan, ang tigpamaba hinuon sa Nacionalista nga si Gilbert Remulla ang napasanginlan tungod kay miduaw diay kini sa amahan ni kanhi Mayor Ampatuan nga si Andal Ampatuan Sr. niadtong miaging bulan didto sa Davao.

Ang senatoriable sa Liberal nga si Dr. Martin Bautista ang mi-expose sa usa ka oras nga meeting ni Remulla sa amahan nga Ampatuan. Si Remulla ra ba bayaw diay ni Atty. Sigfrid Fortun nga maoy abogado sa mga Ampatuan human sa Nobiyembre 23 nga massacre sa Maguindanao nga mibilin og 56 ka patay, apil na ang kapin sa 30 ka kauban namo sa media.

Dili usab tingale maayong pasanginlan si Remulla nga kini maoy gipadala ni Villar ngadto sa mga Ampatuan aron pangayuon niini ang ilang suporta uban sa saad nga kun ma-presidente si Villar, whitewash sa Maguindanao massacre case ang bayad.

Unya migawas dayon ang balita nga si acting Justice Sec. Alberto Agra mipakawalay sala kang ARMM Gov. Zaldy Ampatuan ug Mamapasano Mayor Akmad Ampatuan.

Makalibog ba ang koneksiyon sa maong mga panghitabo?

* * *

Misugmat na usab kining mga binuang sa atong Office of the Building Official (OBO) nga mang-isyu og mga building permit bisan dili angay isyuhan ang usa ka construction site. Tiaw mo na, sulod sa usa lang ka bulan, duha ka mga construction site ang walay suwerteng nangahugnoan sa gipangtukod nga mga proyekto.

Una niini ang firewall sa Gaisano Tisa nga mikalas og lima ka kinabuhi sa mga trabahante niini.

Niadtong Sabado sa gabii, usa na usab ka building sa IT Park sa barangay Apas ang nahugno. Maayo gani walay kinabuhi nga nakalas apan duha ang naangol.

Maingon kaha niana ang maong duha ka building kun wala pay binuang diha sa OBO?

Dili lang kay kana lang maong edipisyo sa Gaisano Tisa ang nakit-an sa kadaghanan nga hilabihan kadaghan og kalapasan sa pagtukod. Suwerte lang tingale kay wala mahunlak mao nga wala makit-i sa publiko ang ilang kasaypanan.

Ang OBO maoy gitahasan sa Cebu City Hall pagsuperbisar sa mga construction project sa siyudad. Apan sa dili pa unta magsugod ang konstruksiyon, mo-aplay ang engineer og permit sa OBO.

Wala na kita masayod giunsa paggitik sa mga engineer ang OBO, makasugod sila sa ilang trabaho bisan wala pay permit. Mao nga kadaghanan sa mga construction site, walay anti-hazard warning device ug safety devices nga ipangtaod ang dili maalanganin ang mga tawong mangagi.

Pero kun dili pa tingale huyang ang liderato sa siyudad sa Sugbo, dili tingale maggara-gara kanang mga kagwang diha sa OBO.

Hain naman diay si Mayor Tomas Osmeña? Nganong nawala naman iyang pagkaisog paggunit sa liog sa iyang mga department heads? Tungod ba kay nagmasakiton siya, dili na siya makapamadlong sa iyang mga sakop?

Diha ra bay balita nga niadtong miaging gabii nga pulong-pulong sa Bando Osmeña Pundok Kauswagan (BOPK), mi-collapse kuno si Tomas. Gisulod siya sa usa ka ospital alas 11:30 sa gabii kay nagliponglipong ug nakagawas alas 4 na sa hapon.

Dili ba kaha kini epekto na sa iyang mga operasyon sa iyang kanser sa pantog?

* * *

Maayong basulon ni Gob. Gwendolyn Garcia iyang kaugalingon nganong nagkatibulaag na ang iyang pamilya sa pagsuporta og laing kandidato nga dili niya gustong suportahan.

Nganong but-an man ni Garcia iyang inahan nga si kanhi RTC Judge Esperanza Garcia, ug mga igsuong si Byron ug GSIS president Winston Garcia kun adto sila mosuporta kang Villar?

Ang pasumbingay ni Byron sa laing pamantalaan naghulagway ni Gwen nga mabuotbuoton. Sa ato pa, midesider tingale kini nga mobarog ni Lakas-Kampi-CMD standard bearer Gilbert Teodoro hangtod sa Mayo 10, nga siya-siya lang ug wala tingale kunsultaha iyang pamilya.

Anaa na tingale ni Gwen ang pagka-diktador. Mao kini hinungdan nga mi-resign sa Lakas-Kampi-CMD ug One Cebu party si Kongresista Nerissa Soon-Ruiz nga kandidata pagka-mayor sa Mandaue. Mireklamo si Soon-Ruiz nga wala ang hinungdan sa iyang pag-resign mao nga adunay daghang butang ug kalihukan sa partido nga wala siya kunsultaha sa gobernadora.

Lakip na tingale niana kun kinsang presidentiable ang iduso sa One Cebu party. Kay sa akong nadunggan, daghan ang ganahan mo-endorso kang Villar, apan napugos lang og barog ni Gibo ang mga mayor tungod ni Gwen.

Apan niining pag-anam-anam og bali sa mga mayor ngadtong Villar, tan-awon nato asa kutob kanang iyang gipanghambog nga “palabra de honor” kun moabot ba gyud na sa Mayo 10.

* * *

Email: [email protected]