Masumpo ba ang corruption?

Halos tanang kandidato pagka-presidente sa nasud nangante og kabag-ohan gikan niining kasamtangan nga administrasyon. Ug usa sa ilang saad mao ang pagsumpo sa corruption sa gobiyerno.

Hinuon ang corruption daan nang problema sa nasud. Ug midulot na kini sa kabukogan sa atong sosyodad. Ug dili na siguro kini mapapha pa bisan kinsa pa ang presidente sa Pilipinas.

Si Senador Benigno “Noynoy” Aquino III, ang standard bearer sa Liberal Party, naanad na sa iyang kampanya pagbatikos sa kasamtangang kagamhanan tungod sa grabe’ng corruption nga gikalambigitan kuno niini.

Gani sa iyang political ad, gibatikos ni Aquino ang kawalay tambal sa mga hospital sa gobiyerno ug kabati sa kadalanan sa kabaryohan sa nasud. Kini, matud pa niya, gumikan kuno sa grabe nga corruption. As usual, nanganti siya’g kaayohan kun siya na ang presidente.

Ang pambato usab sa Nacionalista Party nga si Senador Manny Villar misaad nga iyang bungkagon ang mga gamot sa corruption sa mga nagkadaiyang buhatan sa kagamhanan. Gani matud niya nga dili na niya kinahanglan pa nga mangawat sa salapi sa katawhan aron lamang pagpaburot sa iyang kaugalingon gumikan kay mabuhi na siyang desente sa iyang kabtangan.

Wala usab magpalupig ang ebanghelista nga si Eddie Villanueva. Ang kandidato sa Bangon Pilipino ug lider sa usa ka dakong relihiyosong grupo nanganti usab nga sulod sa unom ka tuig ilalom sa iyang kagamhanan, walay corruption sa tanang ahensiya sa gobiyerno.

Ug wala usab magpalupig kining usa sa nangiwit nga kandidato. Ang independente nga si Nicanor Perlas adunay maayo kunong programa pagsumpo sa naghitak nga corruption sa kagamhanan.

Matud niya nga iyang sumpoon ang corruption sulod sa 100 ka adlaw sa iyang pangatungdanan isip presidente. Gani, kampante siyang mahinloan ang mga corrupt nga departamento sa gobiyerno.

Pipila sa mga ahensiya sa kagamhahan nga iyang giingon nga labing corrupt mao ang Department of Trade and Industry, Department of the Environment and Natural Resources, Department of Public Works and Highways, ug ang Department of Education.

Hinuon dili na nato ikatingala nga ang pagwagtang sa corruption maoy nag-una sa agenda niiining maong mga kandidato. Nasayod kita nga ang kasamtangang administrasyon puno sa mga corruption scandal sulod sa siyam ka tuig niining pagkupot sa renda sa pangagamhanan.  

Gani, nag-una niining mga akusasyon sa corruption mao ang fertilizer scandal nga gikalambigitan ni kanhi agriculture undersecretary Jocelyn Bolante ug ang national broadband deal uban sa Chinese company nga ZTE nga gikalambigitan usab ni kanhi Commission on Elections chairman Benjamin Abalos.   

Tungod niini, dili gayud malikayan nga ang isyu sa grabe’ng corruption sa gobiyerno motumaw niining panahon sa eleksiyon. Tanang kandidato nagsaad og kabag-ohan sa sistema alang sa kalamboan sa nasud, kansang katawhan nag-ilaid karon sa kalisod.  

Apan ang pangutana mao kini: matuman kaha kining ilang mga pangante pagsumpo sa corruption sa ilang pamunoan? Aduna kaha silay kapabilidad ug political will pagpadagan sa usa ka limpiyo nga gobiyerno kansang mga buhatan puno sa mga buaya?  

Sa akong pangagpas dili. Grabe na kaayo ang corruption sa kagamhanan. Gani midulot na kini gikan sa kabarangayan ngadto sa opisina sa presidente.

Ug nagkinahanglan gayud og milagro ang pagsumpo niini.

* * *

Email: [email protected]