Tapus sa Cuaresma, unsa man?

Sa among panahon, sa mga bata pa mi (sa ato pa, dugay-dugay na gyud), tinud-anay ang among pag-observe sa Lent, ilabina sa Semana Santa. Maoy among namat-ag kahayag nga serious kaayo ang among mga elders pagtuman sa mga kalihokan sa Simbahan.

Tinuod gyud nga panahon sa paghinulsol, pagpamalandong, pagpenetensiya, pagpuasa, ug sa dili pagkaon og karne sa mga adlaw nga gidili. Sa Hueves ug Viernes Santo, off the air ang tanang radio ug TV stations (wa pa may Cable niadto, ug pila lang ka radio ug TV station). Kun duna may mag-on the air, pulos soft music ang mga ipatugtog.

Ang Sabado Santo sa among panahon, tinuod gyud nga Black Saturday. Kabahin pa sa pagpamalandong. Apan, karon, fiesta na, mangaligo na sa dagat pagsaulog sa pagkamatay sa Ginoo. Di gyud kahuwat og usa ka adlaw.

Basta kay sa among panahon, ang atmosphere sa Lent ilabina sa Holy Week, panahon gyud sa pagpamalandong ug paghinulsol. Maoy hinungdan nga sa Easter Sunday, dakung fiesta alang kanamo, kaylagi, gikan sa paghandom sa pagpasakit ug pagpakamatay ni Cristo Hesus, nagpasakit usab kami uban kaniya, ug nabanhaw usab kami uban kaniya. Nabanhaw gikan sa pagkalubong gumikan sa pagpakasala.

Mao ni ang giingon nga walay epekto alang kanato ang Pagkabanhaw kun wala motuhop sa atong kasingkasing unsa ang kahulogan sa Viernes Santo. Nganong malipay ka man sa Pagkabanhaw sa Ginoo nga wala ka man maguol sa iyang pagkamatay? Dili nimo ma-felt ang kalipay kun daan kanang nagmalipayon, ug kun wala ikaw magmasulob-on.

 Buot natong ipangutana dinhi kun unsa may epekto alang kanato ang pag-observe sa Lent ug sa Pasko sa Pagkabanhaw? Kun ang Semana Santa, alang kanimo, vacation time, nan,di nimo ma-felt ang kalipay sa Easter Sunday kaylagi, daan ka na mang nagmalipayon.

Bakasyon alang sa uban ang Semana Santa. Inay magpuasa, maghinulsol, mosimba, mag-way-of-the-cross, mokompisal, mokalawat, mag-Visita Iglesia, mag-rosaryo, mag-spiritual reading – tua hinoon sa Boracay, ug ubang mga dapit bakasyonanan.

Hinoon, ila kining katungod. Daghan silag kwarta, ug walay makabuot nila unsaon paggasto ang ilang kwarta, ug labaw pang walay makabuot kun asa sila mamalandong ug maghinulsol. After all, God is everywhere, ug labing seguro, tua sad sa Boracay.

Anyway, maoy atong panghinaut nga ang atong pag-observe sa Cuaresma, ug pagsaulog sa Pagkabanhaw, nakahatag kanato’g kahigayonan pag-assess ug pag-audit sa atong personal nga performance in relation sa Tag-iya sa hinulaman tang kinabuhi.