Fight sir Davide!

Naminaw ko dihang si kanhi Cebu City councilor Hilario Davide III, nga karon kandidato pagka gobernador sa Sugbo, gi-interview sa radyo kagahapon pinaagi ni Leo Lastimosa.

Natimbang-timbang nako sa iyang tingog nga buotan g’yod si Davide ug angayan gayod nga siya himoong gobernador. Hinoon, kun maminaw ka sa mga report, lisud kuno pildehon si Gwen Garcia.

Aw natural lang nga maisip nato nga lig-on si Gwen kay unom ka tuig na siya nga nahimong gobernador ug daghan siya og mga alalay sa kalungsuran.

Apan dihang nahimo namo nga bisita si Gwen sa “Know Your Candidates forum” sa The Freeman, gusto g’yod unta ko nga maminaw unsaon niya pagrason nga dili binuang ang pagpalit sa Kapitolyo og yuta nga anaa ilawom sa dagat.

Ang kalimitado sa oras maoy rason nga nahukman nga dili na lang hisgotan ang maong isyu. Sa laktod, wala ko makontinto sa tubag ni Gwen kay nasabot nako nga duna siya’y gitipigan nga inpormasyon.

Nakadungog man tingali kamo nga gihinay-hinayan na kuno og pagpalagpot ni Gwen ang iyang igsoon nga si Byron sa pagdumala sa Cebu provincial jail ug sa South Bus terminal.

Gipangutana nako si Gwen kun ngano man kini? Wala tubaga ni Gwen ang maong pangutana. Nganong mahadlok ka man? Duna kay gitagoan? Angay man tingali nga masayod ang katawhan niini kay si Byron gitugyanan man nimo og katungdanan sa kagamhanan.

* * *

Nakagusto man god ko sa programa ni Davide kun siya ang mahimong gobernador.

Kun toohan nato ang pamahayag ni Gwen nga ang probinsya dunay dakung kwarta nga gitipigan karon, dili kini maayo kay masabot man nga wala gastoha ni Gwen ang maong kwarta sa kaayohan sa katawhan.

Mao kini ang rason nga bisan og dunay hilantan sa mga taga probinsya, mag-iniktin na og dagan ang mga ambulansya paingon sa mga ospital dinhi sa dakbayan.

Unsaon, ang mga ospital sa kalungsuran wala man maatiman. Kun si Davide ang mahimong gobernador, iyang gipasalig nga gastohon g’yod ang kwarta alang sa katawhan.

Sama god sa dakbayan sa Sugbo nga si Mayor Tomas Osmeña mogasto g’yod sa kwarta alang sa katawhan sa dakbayan. Dili man angay nga ang usa ka local government units magpadatu pinaagi sa pagtigum sa iyang mga koleksyon nga buhis.

Pagka-nindot, putlon na ni Davide ang pagpasiatab diin ang ngalan sa gobernador ipatik diha sa mga karatola sa mga proyekto ug sa mga sakyanan.

Putlon na unya ni Davide ang pagpabayad sa mga tawo og tag P5 niadtong mosulod diha sa south bus terminal. Pagka-nindot.

Labaw sa tanan, gipasalig ni Davide nga kun siya mapili nga gobernador dili niya usikan ang kwarta sa probinsya pinaagi sa pagpalit og yuta nga anaa sa dagat. He! He! He!

* * *

Giawhag diay nako kadtong mga kandidato sa pagka mayor dinhi sa dakbayan nga mokontak sila sa The Freeman aron matakda ang ilang pagtambong sa “Know Your Candidates forum.”

Palihug pangitaa lang si Joeberth Ocao, ang producer sa maong kalihukan, o kaha tawga ko sa 511-7984.

Ang pangutana ug mga tubag sa mga kandidato ipublikar namo sa “page 1” g’yod sa Freeman. Tampo namo kini aron kamong mga kandidato mailhan sa katawhan ug matimbang-timbang nila unsay inyong mga programa kun mapili.