Kanus-a man gyud ta ma- self sufficient sa bugas?

Bugas, dakung isyo alang kanatong mga Pilipinhon, ma-panahon sa eleksyon o dili, ma-adunay bagyo, lunop o wala, ma-El Niño o wala. Kini tungod kay alang kanato, ang bugas, atong kinabuhi.

Mao man gani hinungdan nga daku ang atong katingala nga wala kaayo kini hatagi’g gibug-aton sa atong mga nasudnong kandidato, nga mamahimo kitang self sufficient sa rice production.

Hinoon, dihay forum nga nadaklitan kini’g hisgut ni Senador Villar nga usa sa makalingkawas sa kawad-on mao ang pagpa-abunda sa abot sa atong kaumahan. Sa ato pa, agricultural production.

Sa ato nang giingon dinhi, sa ubang kanasuran, maoy ilang giuna ang agricultrual production, aron nga kun unsa man ang mahitabo, dili sila magutman. Apan, kita dinhi, politika ang priority. Maoy hinungdan nga gutom ang Pinoy, ug kanunay kitang nagsalig sa importasyon sa bugas.

Di ka mauwaw ini, Dro ?

Gihatagan kita’g maanindot kaayo nga climate sa Ginoo. Tabunok ang atong kayutaan ug kadagatan. Tibuok tuig pabor sa produksyon ang panahon. Busa, walay rason nganong magsalig kita sa ubang kanasuran sa pagkaon.

Pagkakaron, ang main source sa atong bugas, mao ang Vietnam. Ngano man diay, wala bay bagyo, walay lunop, walay El Niño, ug walay peste sa Vietnam nga di man sila mahutdan sa bugas?

Niay karaang report (1981) sa New Society ni Marcos, atong kutloon: “Three years after the launching of Masagana 99 in 1973 (natawo na ka ini, Dro?), we attained self-sufficiency in rice. Since 1977, we have exported a total of 522,414 MT of rice valued at $152 million or P1,140.75 million. Our success in rice production has enabled the farmer to increase his income such that a farmer with an average farm size of 1.2 hectares of irrigated land nets P1,150.00 per crop, or an increase of 150% over his new income in 1973 of P425 per crop, in spite of higher cost of inputs at that time.”

After him, wa na gyud maka-export og bugas. Ngano man? Sige na tag pamalit og bugas gikan sa ubang kanasuran. Ug karon, lakip na ang asukar nag-import na sad ta. Ngano man?

Aw, di mo motuo sa report? Kun di mo motuo, kinsa may inyong tuhoan? Basta kay, ang atong pangutana, nga kun naka-export kita’g bugas panahon sa labing gikasuk-an natong Presidente sa nasud, nganong gikan ni Cory, hangtud karon sige na man tag import og bugas? Wa ko mangampanya ni Bongbong, ha. Wa na siya kaila nako. Di sad tingali ko mobotar niya.